Երևանի Հանրապետության հրապարակում մեկնարկել է վարչապետ Նիկոլ Փաշինյանի հրաժարականի պահանջով հանրահավաքը: Ելույթ են ունեցել ՀՀ պաշտպանության նախկին նախարար Սեյրան Օհանյանը, ԱԺ նախկին փոխնախագահ Արա Սահակյանը և այլք: Ընդդիմադիր կուսակցությունները պատրաստվում են վաղն առավոտից շրջափակել ՀՀ կառավարության շենքը: ՀՅԴ ներկայացուցիչ Գեղամ Մանուկյանը մեկնաբանեց, որ վաղը նախատեսված է Կառավարության նիստ, և իրենք շրջափակելու են Կառավարության շենքի բոլոր մուտքերը, որպեսզի թույլ չտան գործադիրը նիստ անցկացնի:
Մինչ այդ ընդդիմադիրներն այս գիշեր ևս շարունակելու են գիշերել Հանրապետության հրապարակում: Հիշեցնենք՝ ընդդիմադիր կուսակցությունները երեկվանից վրաններ են տեղադրել Հանրապետության հրապարակում՝ հայտարարելով շուրջօրյա հանրահավաքներ: Ընդդիմադիր ուժերի առաջնորդներից ոչ ոք, սակայն, հրապարակում չի գիշերել: Լուսադեմին 15-20 մարդ է եղել վրաններում: Խորհրդարանական և արտախորհրդարանական 16 ընդդիմադիր կուսակցություններից բաղկացած «Հայրենիքի փրկության շարժում» նախաձեռնությունը պատրաստվում է դեկտեմբերի 24-ի կառավարության նիստից առաջ շրջափակել գործադիրի շենքի բոլոր մուտքերը: Այս մասին Հանրապետության հրապարակում հրավիրված հանրահավաքի ավարտին ասաց Հայ յեղափոխական դաշնակցություն կուսակցության անդամ Գեղամ Մանուկյանը:
Այսօր՝ դեկտեմբերի 23-ին, Հանրապետության հրապարակում ժամը 16։00-ից վերսկսվել է վարչապետ Նիկոլ Փաշինյանի հրաժարականի պահանջով ընդդիմության ցույցը։ «Իրազեկ քաղաքացիների միավորումը» աերոնկարահանման և մարդկանց անհատական հաշվարկի միջոցով պարզել է, որ Հանրապետության հրապարակում ժամը 17։30-ի դրությամբ գտնվել է մոտ 2100 մարդ։ Լուսանկարը բարձր որակով հասանելի է այստեղ։ Հաշվարկը ստուգելու նպատակով մարդկանց անհատականացնող կետերով նկարը կարելի է ներբեռնել այստեղից:
Խորհրդարանական և արտախորհրդարանական 16 ընդդիմադիր կուսակցություններից բաղկացած «Հայրենիքի փրկության շարժում» նախաձեռնությունը բողոքի ակցիաներ է իրականացնում` պահանջելով ՀՀ վարչապետ Նիկոլ Փաշինյանի հրաժարականը: Նախաձեռնության վարչապետի միասնական թեկնածուն ՀՀ նախկին վարչապետ և Պաշտպանության նախկին նախարար Վազգեն Մանուկյանն է: Դեկտեմբերի 22-ին շարժումը հայտարարել է համահայկական դասադուլ և գործադուլ: