Միավորված ընդդիմադիր քաղաքական ուժերն այսօր վարչապետի հրաժարականի կոչով քայլարշավ են իրականացրել Սասունցի Դավթի արձանի մոտից: «Արժանապատվության քայլարշավի» մասնակիցները կոչ են արել քաղաքացիներին միանալ իրենց բողոքի ակցիաներին: Երթին մասնակցող «Հայրենիք» կուսակցության նախագահ Արթուր Վանեցյանը չի պատասխանել լրագրողների հարցին՝ արդյոք ադրբեջանական կողմը իր միջոցով հինգ միլիարդ դոլարի դիմաց հողեր հանձնելու առաջարկ արե՞լ է, թե՞ ոչ: «Բարգավաճ Հայաստան» կուսակցության փոխնախագահ Վահե Էնֆիաջյանն էլ հայտարարել է, որ տարիներ շարունակ ստեղծված քաղաքական կեղծ օրակարգը հանգեցրել է ներկա իրավիճակին: Հայ հեղափոխական դաշնակցության Գերագույն մարմնի ներկայացուցիչ Իշխան Սաղաթելյանն ասել է, թե պայքարը ժամ առ ժամ նոր թափ է հավաքում, իրենց միանում են նոր քաղաքացիներ:
Ընդդիմադիր կուսակցությունների այսօրվա քայլերթի վերջնակետը Ֆրանսիայի հրապարակն էր: Ընդդիմության թեկնածու Վազգեն Մանուկյանը հայտարարել է՝ վարչապետը պետք է հեռանա:Նա համոզմունք է հայտնել, որ ընդդիմությունը կկարողանա ստեղծել այն պետությունը, որի մասին երազում են բոլորը:
«Իրազեկ քաղաքացիների միավորումը» աերոնկարահանման միջոցով հաշվել է այսօր՝ դեկտեմբերի 15-ին, վարչապետ Նիկոլ Փաշինյանի հրաժարականի պահանջով ընդդիմության ցույցի մասնակիցների քանակը։ Մասնավորապես, ժամը 18։55-ի դրությամբ Երևանի Ֆրանսիայի հրապարակում ցույցին մասնակցել է 2700-2800 մարդ։ Հաշվարկն իրականացվել է աերոնկարահանմամբ՝ մարդկանց անհատական հաշվարկի միջոցով։ Լուսանկարը բարձր որակով հասանելի է այստեղ։ Հաշվարկը ստուգելու նպատակով մարդկանց անհատականացնող կետերով նկարը կարելի է ներբեռնել այստեղից։
ՀՅԴ ԳՄ անդամ Իշխան Սաղաթելյանը այսօր հայտարարել է, որ ընդդիմության երթերը շարունակական են լինելու։ Ըստ Սաղաթելյանի՝ վաղը տեղի է ունենալու երթ Կրկեսի մոտից , հինգշաբթի օրը դարձյալ երթ՝ Հալաբյան փողոցից։ Իսկ արդեն շաբաթ օրը՝ 15:00-ին ընդդիմությունը հանրահավաք է անցկացնելու Ազատության հրապարակում։