ՀՀ վարչապետ Նիկոլ Փաշինյանն այսօր Սյունիքի մարզում է: Վարչապետին ուղեկցում է ՏԿԵ նախարար Սուրեն Պապիկյանը, ԱԺ փոխնախագահ Ալեն Սիմոնյանը և այլ պաշտոնյաներ:
Այն պահին երբ ՀՀ վարչապետ Նիկոլ Փաշինյանը ժամանեց Մեղրի, քաղաքում արդեն լարված իրավիճակ էր ստեղծվել: Տասնյակ մարդիկ էին փողոց դուրս եկել և բողոքի ակցիա էին իրականացնում: Նրանք փորձում էին խոչընդոտել նրա շարժը քաղաքում: Քաղաքացիները պահանջում էին, որ նա հեռանա, նշելով, որ ոչինչ չունեն իր հետ խոսելու:
ՀՀ վարչապետ Նիկոլ Փաշինյանը Սյունիք կատարած այցի ընթացքում Ագարակում շրջում էր փողոցներում, շփվում քաղաքացիների հետ, սակայն մի խումբ անձինք փորձում էին խոչընդոտել վարչապետի տեղաշարժը՝ բարձր վանկարկումներով, քաշքշուկներով, հայհոյախառն արտահայտություններով: Փաշինյանը ի պատասխան այդ քաղաքացիների պահվածքի՝ մյուսներից ներողություն խնդրեց:
«Մենք ենք մեղավոր: Ներողություն եմ խնդրում բոլորիցդ սրա համար»,-ասաց Փաշինյանը:
Նշենք, որ վարչապետը դեռ երեկվանից է Սյունիքում: Երեկ երեկոյան Փաշինյանն Ալեն Սիմոնյանի հետ այցելել էր Շուռնուխ՝ հյուրընկալվելով մի քանի բնակիչների:
ՀՀ գլխավոր դատախազությունը Սյունիքում կատարված դեպքերի առնչությամբ ոստիկանությանը հանձնարարել է քրեադատավարական կարգով վարույթ իրականացնել: «Հայկական ժամանակի» հարցին ի պատասխան՝ այդ մասին հայտնեց ՀՀ գլխավոր դատախազի խորհրդական Գոռ Աբրահամյանը: Ոստիկանության լրատվականից տեղեկացնում են, որ այս պահի դրությամբ Սյունիքի դեպքերի հետ կապված բերման ենթարկվածներ չկան:
Նշենք, որ Սյունիքում վարչապետ Նիկոլ Փաշինյանի այցի ժամանակ մի խումբ անձինք սադրանքներ են հրահրել, բարձրացել նրա ծառայողական մեքենայի վրա, քաշքշել անվտանգության ծառայության աշխատակցին՝ պատռելով հագուստը, հայհոյանքներ ու սպառնալիքներ հնչեցրել:
Այցի ընթացքում Փաշինյանը արդեն եղել է Ագարակում, Մեղրիում, այժմ Կապանում է:
