Այսօր ժամը 15:00-ին Ազգային ժողովում նախատեսված է «Իմ քայլը» խմբակցության անդամների փակ հանդիպումը ՀՀ վարչապետ Նիկոլ Փաշինյանի հետ: Հանդիպմանը հրավիրված է նաեւ արդարադատության նախարար Ռուստամ Բադասյանը:
ՀԺ-ի տեղեկություններով՝ հանդիպման ընթացքում քննարկվելու են Ընտրական օրենսգրքի բարեփոխումները, որոշվելու են առաջնահերթությունները, ռազմավարական ուղղությունները: Մասնավորապես, քննարկվելու է ռեյտինգային համակարգ ունենալու նպատակահարմարությունը, ընտրական հանձնաժողովների մոդելի հարցը, ընտրություններից հետո մինչեւ քանի կուսակցություն կարող է կոալիցիա կազմել եւ այլն:
Այսպիսով, ՀՀ իշխանություններն ամբողջ ծավալով ձեռնամուխ են եղել Ընտրական օրենսգիրքը բարեփոխելու գործին: Անցած շաբաթ ԱԺ-ում ճեպազրույցների ժամին պատգամավոր Համազասպ Դանիելյանը տեղեկացրել էր, որ նախատեսում են՝ հունվարին բարեփոխումների նախագիծը պատրաստ լինի, այնուհետեւ 2 ամիս քննարկվի ու ընդունվի:
Հիշեցնենք, Ընտրական օրենսգրքի փոփոխությունը պատերազմից հետո Փաշինյանի հրապարակած ճանապարհային քարտեզի կետերից մեկն է:
