Թուրքիայի ֆինանսների նախարար Բերաթ Ալբայրաքը իր Ինստագրամի միկրոբլոգում հայտնել է հրաժարական տալու մասին։ Վերջինս որպես հրաժարականի պատճառ նշել է առողջական խնդիրների առկայությունը։
«Որոշում եմ կայացրել առողջական խնդիրներիս պատճառով դադարեցնել նախարարի պարտականությունների կատարումը, որոնք իրականացրել եմ մոտավորապես 5 տարի շարունակ»,- նշված է Ալբայրաքի գրառման մեջ։
Հիշեցնենք, որ թուրքական ազգային արժույթը շարունակում է պատմական անկումը։ Ինչպես ընդդիմադիր, այնպես էլ անկուսակցական պատգամավորները պահանջում էին Թուրքիայի ֆինանսների նախարար Բերաթ Ալբայրաքի հրաժարականը, ով նախագահ Ռեջեփ Թայիփ Էրդողանի փեսան է: Համացանցում տարածվել էին ծաղրանկարներ՝ «փեսան սպանեց տնտեսությունը» վերնագրով:
«Տնտեսությունում հրդեհ կա: Խնդիր կա մեքենայի շարժիչի հետ, դուք միայն անվադողն եք փոխել ու ուզում եք այն շարժվի: Այս հիանալի երկիրը հասցրել եք խղճալի վիճակի»,- «Թվիթերի» իր միկրոբլոգում գրառում է կատարել «Ապագա» կուսակցության նախագահ Ահմեդ Դավութօղլուն:
Նշենք, որ ավելի վաղ Թուրքիայի նախագահ Ռեջեփ Թայիփ Էրդողանը աշխատանքից հեռացրել է Կենտրոնական բանկի նախագահ Մուրադ Ույսալին:
RegionMonitor-ը հայտնում է, որ պատճառը ազգային արժույթի ռեկորդային անկումն է: Ույսալի փոխարեն ԿԲ նախագահ է նշանակվել նախագահի աշխատակազմի ռազմավարական և բյուջետային վարչության պետը, ով 2015-2018թթ. զբաղեցրել էր Թուրքիայի ֆինանսների նախարարի պաշտոնը:
