ՀՀ վարչապետ Նիկոլ Փաշինյանի հրաժարականի պահանջով «Արժանապատվության երթ» ակցիան այս անգամ ևս ավարտվեց Ֆրանսիայի հրապարակում: Այսօրվա երթը մեկնարկել էր Երևանի ԹՈՒՄՈ կենտրոնի շենքի տարածքից։ Երթի մասնակիցները քայլել են Կիևյան, Օրբելու փողոցներով, այնուհետև շարժվել դեպի Բաղրամյան պողոտա և երթը ավարտել կրկին Ֆրանսիայի հրապարակում: Ընդիմադիր ուժերը պահանջել են վարչապետ Նիկոլ Փաշինյանի հրաժարականը:
«Հայրենիք» կուսակցության առաջնորդ Արթուր Վանեցյանը լրագրողների հետ զրույցում կարծիք է հայտնել, թե Փաշինյանն ապացուցել է, որ ի վիճակի չէ երաշխավորելու երկրի և ժողովրդի անվտանգությունը: «Մեկ Հայաստան» կուսակցության ղեկավար Արթուր Ղազինյանն էլ քաղաքացիներին տեղեկացրել է, որ երեկ գլխավոր դատախազին ուղղված նամակի պատասխանը արդեն ստացել է: Հիշեցնենք՝ նամակը վերաբերում էր Մովսես Հակոբյանի հայտարարությունների հիման վրա հարուցած քրեական գործին: Հակոբյանն ասել էր, թե պատերազմի մեկնարկից երեք օր անց Նիկոլ Փաշինյանը հանձնարարարել է դադարեցնել բանակի համալրումը: ՀՅԴ անդամ Գեղամ Մանուկյանը հրապարակեց առաջիկա 3 օրերին նախատեսվող քայլերի ժամանակացույցը․
դեկտեմբերի 18-ին ժամը 19.00-ին, Երևանի Գարեգին Նժդեհ հրապարակից երթ դեպի Եռաբլուր, դեկտեմբերի 19-ին ժամը 15.00-ին Երևանի Ազատության հրապարակում հանրահավաք, դեկտեմբերի 20-ին ժամը 12.00-ին Երևանի Հանրապետության հրապարակում հանրահավաք։
«Իրազեկ քաղաքացիների միավորումը» այս անգամ ևս պարզել է երթի մասնակիցների քանակը՝ աերոնկարահանման և մասնակիցների անհատական հաշվարկի միջոցով։
Մասնավորապես, լուսանկարներն արվել են 17։40-ին Կիևյան կամուրջի հատվածում։ Նշված ժամին ընդդիմության երթին մասնակցել է 1700 մարդ։ Ընդ որում, հարկ է նկատել, որ եղանակային պայմանների պատճառով ակցիայի որոշ մասնակիցներ եղել են հովանոցներով, որոնց դեպքում հաշվել են երկուական մարդ՝ հնարավոր սխալներից խուսափելու համար։
Լուսանկարը բարձր որակով հասանելի է այստեղ։ Հաշվարկը ստուգելու նպատակով մարդկանց անհատականացնող կետերով նկարը կարելի է ներբեռնել այստեղից։
