Սոչիում է Թուրքիայի արտգործնախարարը: Մևլյութ Չավուշօղլուն ադեն տետատետ հանդիպում է ունեցել Ռուսաստանի արտգործնախարար Սերգեյ Լավրովի հետ, հանդիպման մանրամասները դեռ չեն հայտնում։ Այս պաին ընթանում է ռուս-թուրքական բարձր մակարդակի համագործակցության խորհրդի շրջանակներում գործող ռազմավարական պլանավորման համատեղ խմբի 8-րդ նիստը, որը նախապատրաստում է Թուրքիայի և Ռուսաստանի նախագահների հանդիպումը եկող տարի։
Թուրքական կողմը ընդգծում է, որ 2021-ը հոբելյանական տարի է լինելու երկու երկրների միջև հարաբերությունների համար։ 1921-ի մարտի 16-ին, հիշեցնենք, Մոսկվան ու Անկարան ստորագրել են Մոսկովյան պայմանագիրը, որով բոլշևիկյան Ռուսաստանը հրաժարվել էր ցարական Ռուսաստանի տարածքից և Թուրքիային հանձնել, այդ թվում` Ղարսը, Արարատը, Էրիվանյան գուբերնիայի արևմտյան հատվածը, նույն այս պայմանագրով Նախիջևանը հանձնվել է Ադրբեջանին։ Երկու երկրներն այս պայմանագիրը համարում են դիվանագիտական հարաբերությունների սկիզբ։
Սոչիում ընդլայնված կազմով բանակցությունները սկսելիս Լավրովն օրակարգային հարցերը ներկայացնելիս հատուկ շեշտել է Ղարաբաղում և Ղարաբաղի շուրջ ստեղծված իրավիճակը` ընդգծելով, որ ղարաբաղյան հարցն առաջնահերթ է դարձել երկու երկրների հարաբերություններում։
Եռակողմ համաձայնագրից հետո Ռուսաստանի և Թուրքիայի նախագահները հայտարարել են, որ հարգում են միմյանց, որ համարում են միմյանց խոսքի և գործի մարդ։ Վլադիմիր Պուտինի և Ռեջեփ Էրդողանի լավ հարաբերությունները այսօր հերթական անգամ շեշտվել է ռուս-թուրքական բանակցություններին։ Նախօրեին ռուսական կողմի տարածած հայտարարության համաձայն` Լավրովն ու Չավուշօղլուն այսօր Սոչիում նախատեսում են մանրամասն քննարկել Ռուսաստանի, Ադրբեջանի և Հայաստանի նախագահների` նոյեմբերի 10-ին Լեռնային Ղարաբաղի վերաբերյալ եռակողմ հայտարարության իրականացման հետ կապված ընթացիկ հարցեր, մասնավորապես հնարավոր բախումների, ռիսկերի նվազեցման և կողմերին հումանիտար օգնություն տրամադրելու հետ կապված հարցեր։
Ռուսաստանի արտգործնախարարության հաղորդագրության մեջ նշվում է. «Ուշադրության կենտրոնում կլինի Լեռնային Ղարաբաղի հակամարտության գոտում կրակի դադարեցման և բոլոր ռազմական գործողությունների վերահսկողության ռուս-թուրքական համատեղ կենտրոնի կարգավորումը: Այս կենտրոնը դիտարկում ենք որպես հետկոնֆլիկտային կարգավորման օժանդակ տարր՝ ի լրումն ռուս խաղաղապահների առաքելության և այլ միջոցառումների։ Կենտրոնի խնդիրների մեջ, ինչպես հայտնի է, մտնում է իրավիճակի մոնիթորինգը տեսողական դիտարկման մեթոդներով, մասնավորապես անօդաչու թռչող սարքերի միջոցով խախտումների մասին տվյալների հավաքումը, ամփոփումը և ստուգումը»:
Հավելենք` Մոսկվան ու Անկարան մի շարք տարաձայնություններ ունեն եռակողմ համաձայնագրի հետ կապված․ Մոսկվան, մասնավորապես շեշտում է, որ մոնիթորինգային կենտրոնը ստեղծվում է ի լրումն ռուս խաղաղապահների առաքելությանը, Անկարան ու Բաքուն հայտարարում են, որ հրադադարը Ղարաբաղում վերահսկելու են ռուս և թուրք զինվորականները։ Բացի այդ, կան տարաձայնություններ նաև Հայաստանի տարածքով Նախիջևանը Ադրբեջանի մնացած տարածքի հետ կապող ճանապարհի հետ կապված․ Բաքուն ու Անկարան այս ճանապարհը կոչում են միջանցք և դրա կառուցումը կապում են Լաչինի միջանցքի հետ:
Ռուսաստանի արտաքին քաղաքականության գերատեսչության տարածած երեկվա տեքստում կա նաև մեկ տող այն մասին, որ ռուսական կողմը լուրջ մտահոգություն է հայտնում հոկտեմբեր-նոյեմբերին Լեռնային Ղարաբաղի հակամարտության գոտի օտարերկրյա վարձկանների տեղափոխման կապակցությամբ: Պաշտոնական Մոսկվան, սակայն, գերադասում է շեշտել, որ այդ ահաբեկիչներին տարածաշրջան է բերել Թուրքիան։