Առաջիկայում սպասվում է ԵԱՀԿ Մինսկի խմբի համանախագահների այցը տարածաշրջան: ԱԺ-Կառավարություն հարցուպատասխանի ժամանակ պատասխանելով պատգամավոր Կորյուն Սիմոնյանի հարցին՝ այս մասին տեղեկացրեց ՀՀ վարչապետ Նիկոլ Փաշինյանը։
Ըստ նրա՝ այս պահին բանակցությունների սեղանին որեւէ փաստաթուղթ չկա, բայց բանակցություններ պետք է տեղի ունենան՝ որոշակի անորոշություններ հստակեցնելու համար:
Հարցի մյուս հատվածը վերաբերում էր գերիների վերադարձի խնդրին: Փաշինյանն ասաց, որ գերիների եւ մարմինների փոխանակման հարցով ամենօրյա աշխատանք է տարվում եւ թեեւ այդ աշխատանքները դեռ ցավոք իրենց հանգուցալուծմանը չեն հասել, բայց ամեն ինչ կանեն, որ օր առաջ դա տեղի ունենա:
Պատգամավորն այնուհետեւ կարծիք հայտնեց, որ «Լուսավոր Հայաստան» կուսակցության վարչապետի թեկնածուն կարող է բանակցություններում հասնել հայանպաստ լուծումների, եւ հետաքրքրվեց, թե հնարավոր չէ՞ Փաշինյանը հրաժարական տա:
«Շատ ուրախ եմ «Լուսավոր Հայաստանի» թեկնածուի համար»,- պատասխանեց Փաշինյանը՝ հավելելով, որ ՀՀ կառավարությունը ի վիճակի է եւ հետեւողական է ՀՀ շահերը այս իրավիճակում պաշտպանելու գործում: