Այսօր Բաղրամյան 26-ում` նախագահի նստավայրում, որտեղ վարչապետ Նիկոլ Փաշինյանը դիմավորում էր ԵԱՏՄ պետությունների ղեկավարներին, վրացական «Ռուսթավի-2» հեռուստաընկերության լրագրողը փորձեց ճեղքել անվտանգության աշխատակիցների կազմած շղթան ու խախտելով արարողակարգը` հարց ուղղեց ՌԴ նախագահ Վալդիմիր Պուտինին:
«Ռուսթավի-2»-ի լրագրողը Պուտինին հարցրեց` ե՞րբ է Ռուսաստանը կատարելու 2008 թ-ին վերցրած պարտավորությունն ու դուրս գալու օկուպացված տարածքներից:
ՌԴ նախագահ Վլադիմիր Պուտինն արձագանքեց լրագրողի հարցին` ասելով, որ Ռուսաստանը միշտ կատարում է իր պարտականությունները: Լրագրողը փորձեց ճշտել` ե՞րբ, սակայն Պուտինն արդեն բավական հեռու էր ու չլսվեց նրա պատասխանը:
Նշենք, որ Վլադիմիր Պուտինը և ԵԱՏՄ պետությունների ղեկավարները Հայաստան են ժամանել այսօր՝ մասնակցելու Երևանում կայանալիք ԵԱՏՄ բարձրագույն խորհրդի նիստին:
