Իշխող ուժը հայտարարել է, որ քանի որ ընդդիմությունը համաձայնությունը չի տվել և հասարակության լայն շրջանում էլ պահանջ չկա, արտահերթ ընտրություններ չեն լինի:
ԱԺ փոխնախագահ Ալեն Սիմոնյանն այսօր, լրագրողների հետ զրույցում, անդրադառնալավ թեմային, ասաց.
«Եթե կան մարդիկ, ուժեր, ովքեր արտահերթ ընտրությունների անհրաժեշտություն են տեսնում, պետք է այդ հարցով դիմեն ԼՀԿ-ին, ԲՀԿ-ին, արտախորհրդարանային ընդդիմությանը, այլ ոչ թե իշխանությանը, քանի որ իշխանությունը արել է այդ առաջարկը, որը չի ստացել համապատասխան պատասխան»:
Այն դիտարկմանը, որ իշխանությունը փակում է սահմանադրական ճանապարհով իշխանափոխություն իրականացնելու հնարավորությունը, Ալեն Սիմոնյանը պատասխանեց. «Այսինքն երբ մենք առաջարկում էինք արտահերթ ընտրությունների գնալ եւ ընդդիմությունը դա մերժում էր, դրանով չէր փակվո՞ւմ սահմանադրական ճանապարհը: Ընտրված իշխանությունը, չունենալով արտահերթ ընտրություններ անցկացնելու ընդդիմության պահանջ, հայտարարում է, որ եթե նման պահանջ չկա, մենք շարունակում ենք աշխատել, դա հակասահմանադրակա՞ն է: Երբ մեր գործընկերները պատրաստ կլինեն քննարկել նման բան, մենք կքննարկենք այդ քննարկումը վերսկսելու հարցը: Քանի դեռ պատրաստ չեն, «Իմ քայլը» ունի իր վարչապետին: Ես լսել եմ ընդդիմության առաջարկը՝ թող Նիկոլ Փաշինյանը հրաժարական տա: Ես էլ ասում եմ՝ թող իրենք բոլորով հրաժարական տան, որովհետեւ ոչ մի կապ չունեն ՀՀ ժողովրդի հետ»:
