Այս շաբաթվա ընթացքում աշխարհի 120 տարբեր հաստատություններում էին անցկացնում կորոնավիրուսի դեմ BioNTech, Pfizer եւ չինական Fosun Pharma ընկերությունների ստեղծած պատվաստանյութերի փորձարկումներ: ԱՄՆ-ում եւս 89 ընկերություններ իրականացնում են Նուբար Աֆեյանի ղեկավարած ‘’Մոդերնա’’ ընկերության ստեղծած պատվաստանյութը:
Նյու Յորքում ‘’Մոդերնա’’-ի պատվաստանյութի ուսումնասիրություններն իրականացնող խմբի ղեկավար Ֆրենք Էդերի խոսքերով, եթե այս պատվաստանյութը հաջողությամբ անցնի նաեւ այս փուլը, կսկսվի նյութի զանգվածային թողարկում:
Չնայած տեխնոլոգիական նոր միջոցների կիրառման արդյունքում պատվաստանյութերը ներկայացվեցին ռեկորդային կարճ ժամանակահատվածում, դրանց ապահովության ու մարդկանց համար անվտանգության հարցերը դեռեւս պետք է ենթարկվեն լուրջ քննության:
Վանդրեբիլթի համալսարանից Ուիլյամ Շաֆներն ասում է, որ ամենամեծ ուշադրությունն այժմ պիտի կենտրոնացվի այս նյութերի անվտանգության վրա: ‘’Փորձարկումների երրորդ փուլը հենց դա է ստուգում’’, ասում է նա:
Հիշեցնենք, որ երրորդ փուլին մասնակցում են տասնյակ հազարավոր կամավորներ, որոնք համաձայնվում են ընդունել պատվաստանյութը: Գիտնականները հույս ունեն, որ արդյունքը կերեւա մինչեւ տարեվերջ:
Օքսֆորդի համալսարանի կողմից ստեղծված պատվաստանյութը նույնպես առաջ է բերել մարդու իմունային համակարգի նկատելի փոփոխություն, սակայն ուժեղ հակազդեցությունը չի երաշխավորում, որ այն մարդուն կպաշտպանի կորոնավիրուսից, ասում են գիտնականները, ու մեկ անգամ եւս շեշտում երրորդ փուլի անցկացման կարեւորությունը:
Պատվաստանյութի չափազանց կարեւորության պատճառով Մեծ Բրիտանիան ու ԱՄՆ-ը ընկերություններին արդեն միլիոնավոր ու միլիարդավոր դոլարներ են հատկացնում, որպեսզի դրական արդյունքի դեպքում զանգվածային արտադրությունը սկսվի առանց վայրկյան կորցնելու:
Հիմա խոսք է գնում այն մասին, թե բնակչության որ հատվածն է առաջինը ստանալու պատվաստում: Եվ կարծիք կա, որ այդ հատվածը լինելու են բուժաշխատողները: