Նիկոլ Փաշինյանն էլ, արձագանքելով հարցին, նշեց, որ ոչ մի հավելված գոյություն չունի։ «Ինձ այսօր ասացին, որ այդպիսի լուրեր կան, թե գոյություն ունեն ինչ-որ հավելվածներ, ինչ-որ այլ բաներ»։
Վարչապետը նաև նշեց, որ պետք է տեղի ունենա սահմանազատման գործընթաց, որը բավականին աշխատատար գործընթաց է։ «Թույլ տվեք ասել, որ կան հարցեր, որոնց հետ կապված առնվազն այս փուլում որևէ հրապարակային քննարկում ոչ մի օգուտ չի կարող բերել, և ես հասկանում եմ գայթակղությունը, որ մենք ուզում ենք բոլոր հնարավոր մանրամասներին անդրադառնալ։ Ոչ մի խոչընդոտ չկա, որ Ազգային ժողովում դռնփակ նիստ հրավիրենք, և ես պատրաստ եմ բոլոր հարցերին, նրբություններով և ապացույցներով անդրադառնալ։ Եվ ուզում եմ ձեզ խնդրել, որ ամեն ինչ հրապարակային քննարկելու այդ գայթակղությունից հրաժարվենք, նաև որովհետև, այնուամենայնիվ, ասվեց, որ բանակցային որոշակի գործընթացներ կան»։
Վարչապետը նաև առաջարկեց, որ որոշ տեղեկություններ այս փուլում չնշվեն։ «Որ ասում են՝ 600 մարդ մյուս տարի կրճատվելու է, սա «ասում են-ի» ռեժիմով հատկապես այս փուլում աշխատելը այդքան էլ ճիշտ չէ, այն պարագայում, երբ կան գործընթացներ, և այդ գործընթացներում մենք ամեն ինչ բաց քննարկենք, ռազմական դրության պայմաններում այդքան էլ ճիշտ չէ։ Հասկանալով, որ ԱԺ-ն և պատգամավորները իրավունք ունեն, և Կառավարությունը պարտավոր է պատասխանել բոլոր հարցերին, առաջարկում եմ դռնփակ նիստ անել, բոլոր հարցերին պատասխանել, հետո կարող ենք պայմանավորվել, թե որ մասն ենք ինֆորմացիայի բաց արտահայտում և որ մասը բաց չենք արտահայտում»։