Խորհրդարանին այսօր ամբողջ օրը այդպես էլ չի հաջողվել ԱԺ փոխնախագահի պաշտոնում ընտրել «Հայաստան» խմբակցության անդամ Իշխան Սաղաթելյանին: Քանի որ ընդդիմության թեկնածուին ընտրելու համար անհրաժեշտ են նաև իշխող խմբակցությունից կողմ ձայներ, «Քաղաքացիական պայմանագիրը» հայտարարել էր, որ իրենք կապահովեն նվազագույն քվեները՝ Իշխան Սաղաթելյանի ընտրվելու համար: Այնուամենայնիվ, փակ գաղտնի քվեարկությամբ Իշխան Սաղաթելյանը չի ընտրվել ԱԺ փոխնախագահ:
Երկրորդ փորձն է կատարվել նրան ընտրելու, սակայն Սաղաթելյանը դարձյալ չի ընտրվել: Ընդդիմությունը երրորդ անգամ է Իշխան Սաղաթելյանի թեկնածությունն առաջադրել: Ողջ օրվա ընթացքում հնչել են փոխադարձ մեղադրանքներ` ընդդիմությունը հայտարարել է, որ «Քաղաքացիական պայմանագիրը» չի պահել խոստումը, իշխող խմբակցությունն էլ ասել է, որ ընդդիմությունը մեղավորներին փնտրի իր շարքերում: Իշխան Սաղաթելյանին ԱԺ փոխնախագահ ընտրելու երրորդ փորձը պատգամավորները կանեն վաղը:
