«Հայրենիքի փրկության շարժման» վարչապետի միասնական թեկնածու Վազգեն Մանուկյանը Բաղրամյան պողոտայում հանրահավաքի ժամանակ կոչ արեց փակել Ազգային ժողովի շենքի բոլոր մուտքերը և ասաց, որ չպետք է թույլ տալ պատգամավորներին մուտք գործել Ազգային ժողովի շենք։ Դրանից հետո իրավիճակը կտրուկ լարվեց, քաշքշուկ սկսվեց ոստիկանների և նրանց միջև: Հանրահավաքի մասնակիցներն այս պահին շրջափակել են խորհրդարանի բոլոր մուտքերը: Ցուցարարներն արդեն վրաններ են տեղադրել Ազգային ժողովի Դեմիրճյան փողոցի մուտքի դիմաց: «Ինտերլուր» լրատվական գործակալության փոխանցմամբ՝ Դեմիրճյան փողոցում ուժեր է կուտակում նաև ՀՀ ոստիկանությունը: Ինչպես հայտնի է, ՀՀ նախագահ Արմեն Սարգսանի առանձնատունը Դեմիրճյան փողոցին հարակից է: Ստացվում է, ցուցարաները փակել են նաև նախագահի տան ճանապարհը. Արմեն Սարգսյանը կարող է տուն գնալ միայն Պռոշյան փողոցով. այսպես ասած՝ հետնամուտքով: Հանրահավաքի մասնակիցների կողմից փակված է նաև Բաղրամյան պողոտան: Շարժման անդամները հայտարարում են, որ խորհրդարանի շենք մուտք գործելու մտադրություն չունեն և խորհրդարանի մուտքերը փակ են պահելու այնքան ժամանակ, մինչև հրաժարական ներկայացնի ՀՀ վարչապետ Նիկոլ Փաշինյանը:
Դեմիրճյան փողոցում ոստիկանական մեծաթիվ ուժեր են կուտակված, որոնք փակել են փողոցի կեսը, իսկ նրանց դիմաց՝ փողոցի մյուս հատվածում, բողոքի ակցիա անող քաղաքացիները վրաններով և աղբամաններով բարիկադներ են ստեղծել:
Ցուցարարները մտադիր են գիշերն անցկացնել Ազգային ժողովի մուտքի մոտ՝ Բաղրամյան և Դեմիրճյան փողոցներում: Իշխան Սաղաթելյանը հանրահավաքի մասնակիցներին կոչ արեց ավելի շատ վրաններ տեղադրել Դեմիրճյան փողոցում և ստեղծել պայմաններ՝ գիշերն այնտեղ անցկացնելու համար: