ՀՀ վարչապետ Նիկոլ Փաշինյանը մասնակցում է ԵԱՏՄ բարձրագույն խորհրդի այս տարվա վերջին գագաթնաժողովին, որն անցկացվում է առցանց ձեւաչափով: Վարչապետը նախ շնորհակալություն է հայտնել նիստը նախագահող կողմին՝ Բելառուսին, այնուհետ խոսել է գազի սակագնի, ինչպես նաեւ դեպի ԵԱՏՄ որոշ երկրներ ՀՀ քաղաքացիների մուտքի արգելքի վերացման մասին:
«ԵԱՏՄ անդամ երկրների հետ սահմաններ չունենալը Հայաստանի համար ստեղծում է որոշ դժվարություններ: Առանց խոչընդոտների ուղևորափոխադրումներն ու բեռնափոխադրումները ԵԱՏՄ պետությունների հետ մեզ համար ունեն կարեւոր նշանակություն: Այս ոլորտում արգելափակումները մեզ համար առավել զգայուն են, այդ պատճառով այսօր արդիական նշանակություն ունի Հայաստանի քաղաքացիների համար ԵԱՏՄ մի շարք երկրներ մուտքի արգելքի վերացման համար պայմանների ստեղծումը»,- ասել է Փաշինյանը:
Նշենք, որ Գագաթնաժողովին ԵԱՏՄ երկրների ղեկավարները կընդունեն մինչեւ 2025 թվականի ռազմավարությունն ինտեգրման մասին, կարող է նաեւ որոշում կայացվել Ուզբեկստանին եւ Կուբային դիտորդի կարգավիճակ տրամադրելու վերաբերյալ: Նրանք եւս մասնակցում են նիստին: