Դեկտեմբերի 30-ին ՀՀ ԱԳ նախարար Արա Այվազյանը հեռախոսազրույց ունեցավ ՌԴ ԱԳ նախարար Սերգեյ Լավրովի հետ։
Ի շարունակություն օրերս կայացած զրույցի՝ ԱԳ նախարարները մտքեր փոխանակեցին նաև տարածաշրջանային խաղաղության, կայունության և անվտանգության հարցերի շուրջ, քննարկեցին ԼՂ հակամարտության գոտում կրակի դադարեցման ռեժիմի պահպանման և Արցախում իրավիճակի կայունացմանն ուղղված քայլերը։
Հայաստանի և Ռուսաստանի արտաքին քաղաքական գերատեսչությունների ղեկավարների հեռախոսազրույցի առանցքում էին նաև հայ-ռուսական օրակարգի մի շարք հարցեր։ Այս առնչությամբ երկուստեք գոհունակությամբ ընդգծվեց երկկողմ դաշնակցային փոխգործակցության բարձր դինամիկան՝ կարևորելով վերջինիս առաջմղումը գալիք տարում:
Հիշեցնենք, որ ավելի վաղ հայտնի էր դարձել, որ Ռուսաստանը պատրաստ է ինչպես ազգային պետությունների մակարդակով, այնպես էլ ԵԱՀԿ Մինսկի խմբի գործունեության շրջանակում կազմակերպել Հայաստանի և Ադրբեջանի ներկայացուցիչների հանդիպում: Այս մասին հայտնել էր ՌԴ ԱԳ նախարար Սերգեյ Լավրովը ՏԱՍՍ գործակալությանը տված հարցազրույցում: Ռուսաստանի արտաքին քաղաքական գերատեսչության ղեկավարի խոսքով՝ նման հանդիպումները կկայանան, եթե կողմերը դրանց պատրաստ լինեն: Ըստ Լավրովի՝ այս պահին օրակարգային խնդիրներն են՝ զինված բախումների բացառումը, զոհվածների աճյունների փոխանակումն ու գերիների վերադարձը, ինչպես նաև, անկախ կրոնական պատկանելությունից, մշակութային կոթողների անվտանգության ապահովումը:
