«Գաղափարը, երբ բարձրաձայնվում է, պետք չէ այն դարձնել հաստատված ծրագիր, որը վաղը Կառավարությունը հաստատելու է»,- այսօր ԱԺ-ում հայտարարեց պատգամավոր Արման Եղոյանը՝ անդրադառնալով Նիկոլ Փաշինյանի՝ պայմանագրային զինծառայությունը 5 տարում 3 ամիսը մեկ իրականացնելու փոփոխությունների մասին հայտարարությանը:
«Այս նախագծի մասին դեռ շատ վաղ է խոսելը, սա դեռ աշխատանքային շատ վաղ քննարկում է, որը բարձրաձայնվել է՝ հանրային քննարկում ծավալելու նպատակով: Քննարկման ժամանակ մարդիկ, մասնագետները, փորձագետները կարծիքներ են հայտնում: Հայտարարված թվերը կարող են և փոխվել»,- ասաց Եղոյանը:
ԱԺ «Իմ քայլը» խմբակցության պատգամավոր Արուսյակ Ջուլհակյանն էլ շեշտեց, որ ընտրություններին մասնակցող քաղաքական ուժերը ներկայացնելու են իրենց նախընտրական ծրագրերը. «Այդ ծրագրերում, բնականաբար, անդրադարձ արվելու է անվտանգային հարցերին, բանակաշինությանը և այլ հարցերի: Երբ կհրապարակվի ծրագիրը, հարցերը կխնդրեմ՝ այդ ժամանակ ուղղել»: