ՀՀ վարչապետ Նիկոլ Փաշինյանի հրաժարականի պահանջով բողոքի ակցիաներ անցկացնող «Հայրենիքի փրկության շարժման» ներկայացուցիչները չեն պատրաստվում ազատել Բաղրամյան պողոտան: Այս մասին լրագրողների հետ զրույցում ասաց շարժման անդամ, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը:
«Մենք հետևողականորեն գնում ենք առաջ: Ցանկանում եմ հստակ նշել, որ նախագահը երկրում ստեղծված իրավիճակի հետ կապված ունի ամբողջական պատասխանատվություն, և ստեղծված իրավիճակից հանգուցալուծման ելքերից մեկն այն է, որ պահպանվի Սահմանադրությունը և դիմի Սահմանադրական դատարան: Վաղը ըստ իրավիճակի կորոշենք մեր քայլերը և կգնանք այդ ուղղությամբ: Ակնհայտ է, որ այս պողոտան չի ազատվելու, մեր գործողություններում նահանջ չի լինելու»,- ասաց Սաղաթելյանը: Շարժման անդամը նշեց, որ արտահերթ ընտրությունների անցկացման վերաբերյալ վարչապետի հետ հանդիպում և քննարկում չեն նախատեսում: Սաղաթելյանը նշում է՝ վարչապետը չի ցանկանում գնալ արտահերթ խորհրդարանական ընտրությունների.
«Դա բլեֆ է: Տեսնելով, որ մեր շարժումը գտնվում է իր վերելքի վրա, նա ցանկանում է փոխել օրակարգը և մեզ մտցնել անիմաստ քննարկման մեջ: Եթե իրենք անկեղծ են, թող հենց հիմա գա ԱԺ, հրաժարական տա ու լինեն արտահերթ ընտրություններ»:
Սաղաթելյանն ընդգծեց՝ իրենք չեն նահանջելու և գնալու են մինչև վերջ: «Ակնհայտ է, որ այս պողոտան չի ազատվելու ու մեր գործողություններում նահանջ չի լինելու: Մենք այսօր ժողովրդի հետ հասել ենք մի կետի, երբ հաղթանակը մոտ է»:
«Հայրենիքի փրկության շարժման» աջակիցները Բաղրամյան պողոտայից շարժվեցին դեպի «Եռաբլուր» զինվորական պանթեոն՝ Կանանց իրավունքների պաշտպանության միջազգային օրը որդեկորույս մայրերի և եղբայրներին ու ամուսիններին կորցրած կանանց կողքին լինելու համար:
