Հանրապետության հրապարակում քաղաքացիները վրաններ են տեղադրում՝ նշելով, որ մնալու են այդտեղ այնքան, մինչև վարչապետը հրաժարական տա:
Ոստիկանների հետ բանակցելուց հետո ԱԺ «Բարգավաճ Հայաստան» խմբակցության անդամ Նաիրա Զոհրաբյանը նշեց, որ վրանների տեղադրումն անօրինական քայլ չէ, սա խաղաղ հավաք է, և արդեն հայտարարվել է, որ լինելու է շուրջօրյա նստացույց:
Առաջիկա ժամերին «Հայրենիքի փրկության շարժումը» Հանրապետության հրապարակում վրաններ կտեղադրի՝ այնտեղ գիշերելու համար: Այս մասին տեղեկացրեց շարժման համակարգող, ՀՅԴ գերագույն մարմնի անդամ Իշխան Սաղաթելյանը: Վերջինս նաեւ նշեց՝ մինչեւ ժամը 18:00-ն ժամանակ են տալիս իշխող «Իմ քայլ» խմբակցությանը, իրենց խոսքերով, ներկայանալու եւ երկրում ստեղծված իրավիճակը քննարկելու, լուծումներ գտնելու համար:
«Հաշվի առնելով, որ մենք խորհրդարանական երկիր ենք՝ վերջին հաշվով խնդիրը լուծվելու է խորհրդարանում: Այս պահից սկսած՝ ժամանակը գնում է»,- նշեց Սաղաթելյանը: Ըստ նրա՝ շրջափակված են մնում կառավարության, դատախազության եւ կրթության, գիտության, մշակույթի ու սպորտի նախարարության շենքերը:
ՀՅԴ ներկայացուցիչը ընդգծեց՝ սա հետեւողական, վճռական, համառ պայքար է լինելու, թեեւ եղանակը ցուրտ է, բայց իրենք պինդ են, ամուր: «Հերթով մեր պահանջները թելադրելու ենք, գնանք առաջ, հետքայլ չկա, նահանջ չկա»,- ընդգծեց շարժման համակարգողը: