Գերմանիայի պաշտպանության նախարար Անեգրետ Կրամպ-Կարենբաուերը հակասություն չի տեսնում Եվրոպայի միակողմանի ուժեղացման եւ եվրատլանտյան հարաբերությունների միջեւ։ Նա այս մասին հայտարարել է տեսակապով ելույթ ունենալով Համբուրգում Բունդեսվերի համալսարանի ուսանողների առջեւ, փոխանցում է DW-ն։
«Անվտանգության քաղաքականությանը վերաբերող հարցում մենք շարունակում ենք ԱՄՆ-ից կախված մնալ եւ միաժամանակ պարտավոր ենք ապագայում, որպես եվրոպացիներ, ինքներս անել այն, ինչը միչեւ հիմա մեր փոխարեն արել են ամերիկացիները»,- նշել է նա։
Նա միաժամանակ «պատրանք» է անվանել այն պատկերացումը, որ հնարավոր է Եվրոպայում «անվտանգություն, կայունություն եւ բարեկեցություն երաշխավորել առանց ՆԱՏՕ-ի եւ ԱՄՆ-ի»։ Երկրորդ աշխարհամարտի ավարտի տարիներից Գերմանիան «կայունության մեջ է ապրում, որը համատեղ ստեղծել է իր եվրոպական հարեւանների եւ ԱՄՆ-ի հետ», ընդգծել է Կրամպ-Կարենբաուերը։
«Ռազմավարական իրադրությունը մեր աչքերի առաջ փոխվում է եւ խորանում»,- նշել է Քրիստոնեադեմոկրատական միության ղեկավարը։ Բացի ԱՄՆ նախագահի ընտրություններից, նա մարտահրավերների թվում նշել է, մասնավորապես, Լեռնային Ղարաբաղում հակամարտությունը եւ Ռուսաստանի պահվածքը, որը «վստահորեն շարունակում է եւ անգամ սպառազինությունը մեծացնում է սովորական եւ միջուկային հրթիռներով»։
Խոսելով ԱՄՆ նոր նախագահ Ջոզեֆ Բայդենի մասին՝ Գերմանիայի պաշտպանության նախարարը չի բացառել, որ նա կարող է վերանայել Գերմանիայում ամերիկյան զինվորականների թվի կրճատման մասին որոշումը, որն ընդունել էր Դոնալդ Թրամփը, փոխանցում է Reuters-ը։
Նոյեմբերի 3-ին ԱՄՆ-ում տեղի էին ունեցել նախագահական ընտրություններ։ Առաջատար ամերիկյան լրատվամիջոցների տեեկություններով՝ դեմոկրատ Ջոզեֆ Բայդենը հանրապետական Թրամփին հաղթելու համար ստացել է Ընտրիչների կոլեգիայի բավարար թվով ձայներ։ Սպիտակ տան ներկայիս ղեկավարը չի ճանաչում պարտությունը եւ փորձում է քվեարկության արդյունքները վիճարկել դատարաններում։
