Թուրքիան չպետք է սահմանափակվի բառերով, այլ պետք է ձեռնարկի իրական գործողություններ, որոնք կբարելավեն իրավիճակը աշխարհի մի շարք տարածաշրջաններում ու բարենպաստ ազդեցություն կունենան Եվրամիության հետ հարաբերությունների վրա: Այս կարծիքը, ըստ ՏԱՍՍ-ի տեղեկատվության, կիրակի հայտնել է Ֆրանսիայի արտաքին գործերի նախարար Ժան-Իվ Լե Դրիանը՝ ելույթ ունենալով ֆրանսիական LCI լրատվական հեռուստաալիքի եթերում:
«Նախագահ Էրդողանի վերջին երկու-երեք օրվա ընթացքում արված հաշտեցնող հայտարարությունները բացարձակապես բավարար չեն: Մենք իրական գործողություններ ենք սպասում»,- ասել է Լե Դրիանը: Դրանց թվում, ինչպես նշել է ֆրանսիացի նախարարը, կան «շատ պարզ գործողություններ, որոնք պետք է ձեռնարկվեն Միջերկրական ծովում և Լիբիայում, կան նաև պարզ գործողություններ Լեռնային Ղարաբաղի առնչությամբ»,- նշել է նախարարը՝ կարևորելով այդ տարածքից սիրիացի զինյալների հեռացումը, որոնք այնտեղ են հայտնվել Թուրքիայի օգնության շնորհիվ:
«Մենք շատ տարաձայնություններ ունենք Թուրքիայի հետ»,- ասել է Ֆրանսիայի արտգործնախարարը՝ մատնանշեով այդ երկրի «էքսպանսիոնիստական նկրտումները» Լիբիայում և Միջերկրական ծովում, որտեղ «Թուրքիան դե ֆակտո ագրեսիվ գործողություններ է իրականացնում ԵՄ անդամ երկու երկրի դեմ»:
«Դեկտեմբերին կայանալու է Եվրամիության գագաթնաժողովը, որի ժամանակ էլ կտրվեն տեղի ունեցող իրադարձությունների գնահատականները»,- ասել է Լե Դրիանը:
