ՀՀԿ փոխնախագահ Արմեն Աշոտյանը ֆեյսբուքյան իր էջում անդրադարձել է այսօր ԱԺ-ում «Լուսավոր Հայաստան» խմբակցության նախագահ Էդմոն Մարուքյանի և «Իմ քայլը» խմբակցության պատգամավոր Սասուն Միքայելյանի միջև տեղի ունեցած ծեծկռտուքին:
Նա, մասնավորապես, գրել է.
«Դուք եռատոնը եռահարամ արեցիք:
Լկտիության, աներեսության, երեսպաշտության պառադ էր: Իր վերջին ելույթով Նիկոլը կրկին ապացուցեց, որ հենց ինքն է այս ամենի հովանավորը, պլատինե սպոնսորը:
Դո՞ւք եք խոսում բռնությունից:
Դո՞ւք եք խոսում ահաբեկումից:
Դո՞ւք եք խոսում սադրանքներից:
Դո՞ւք եք խոսում սպառնալիքներից:
Դո՞ւք եք խոսում վիրավորանքներից:
Դո՞ւք եք խոսում կանանց նկատմամբ հետապնդումներից:
ԴՈ՞ՒՔ:
Մոռացե՞լ եք ձեր արածները, տներ գնա՞լը, դագաղնե՞րն ու ժապավեննե՞րը, քֆուրնե՞րն ու հեռախոսազանգե՞րը: Իսկ մինչև այսօր շարունակվող հոգեբանական, իրավական տեռո՞րը:
Իսկ Մարուքյանի օրինակով մի բան կասեմ ընդամենը: Եթե ժամանակին այս ամենը դատարապարտեիք ոչ թե թաքուն, Viber-ով, կամ Whatsup-ով, այլ հրապարակավ, ուղիղ և նրանց դեմքին, գուցե այսօր այս ամենի զոհը հենց դուք չդառնայիք:
Չգիտեմ, կորոնավիրուսի «զրոյական պացիենտին» երբևէ կգտնեն, թե չէ, բայց Հայաստանում ստեղծված իրավիճակի «զրոյական պացիենտի» անունը հայտնի է՝ Նիկոլ Փաշինյան»:
