«Սիրելի ժողովուրդ, չհուսահատվե՛ք, չվհատվե՛ք, դուխներդ տեղը, գլուխներդ բարձր, որովհետև Հայաստանում կա ապագա: Հայաստանում, Արցախում ապագա կա, հայ ժողովուրդն ունի ապագա, և մենք միասին կերտելու ենք ազատ, երջանիկ և հզոր ապագան»,- այսօր ԱԺ-ում հայտարարեց ՀՀ վարչապետ Նիկոլ Փաշինյանը՝ որն ուղեկցվեց իշխող խմբակցության ծափահարություններով:
Ինչից հետո վարչապետը շեշտեց՝ ապագայի մասին խոսակցություններն ամենակարևորն են.
«Ապագայի մասին խոսակցության ամենակարևոր մասը Լեռնային Ղարաբաղի հարցի կարգավորումն է: Ես ուզում եմ ընդգծել, որ մենք որպես բանակցային հարց պետք է դնենք Լեռնային Ղարաբաղի Ինքնավար Մարզի տարածքի դեօկուպացիայի խնդիրը: Մենք սա պետք է ձևակերպենք ոչ թե որպես ռազմական, այլ որպես բանակցային, քաղաքական հարց»:
ՀՀ վարչապետն ընդգծեց, որ պետք է հետևողականորեն շարունակել Լեռնային Ղարաբաղի համար «Անջատում հանուն փրկության» բանաձևի իրագործումը.
«Դուք տեսաք, թե երեկ կամ նախօրեին ինչ իրադարձություններ տեղի ունեցան Ադրբեջանում: Դա ուղղակի աներևակայելի մի բան է: Կարծում եմ՝ մենք բոլոր հնարավոր ամբիոններից պետք է հրավիրենք բոլորի ուշադրությունը, որ կարող է պատերազմի տառապանքների և զոհերի թանգարան բացվեր մի երկրում, որը հայատյացության, ատելության ամենամեծ և ամենակարևոր դրսևորումն է, և սա ամենամեծ հիմքն է, որ մենք միջազգային հանրությանը ի ցույց դնենք Լեռնային Ղարաբաղի համար «Անջատում հանուն փրկության» սկզբունքի կիրառելիությունը, որը մեր հետագա բանակցային գործընթացի առանցքը պետք է կազմի»,-ասաց վարչապետը:
