Երեւանի Կարեն Դեմիրճյանի անվան մետրոպոլիտենի բնականոն աշխատանքը կաթվածահար է եղել։ Այս մասին «Հայկական ժամանակ»-ի հետ զրույցում ասաց Մետրոպոլիտենի մամուլի խոսնակ Տաթեւ Խաչատրյանը։ Վերջինիս խոսքով՝ մի խումբ քաղաքացիներ անհնազանդության ակցիաներ են իրականացրել Մետրոպոլիտենի Գործարանային կայարանում․ կանգնելով վագոնների դռների արանքում՝ նրանք թույլ չեն տվել, որ մետրոն շարժվի, ինչի պատճառով կանգնեցվել է ողջ երթեւեկությունը։ Խաչատրյանը նշեց, որ վագոններում մնացած քաղաքացիներ չկան, բոլորը դուրս են հանվել։ «Երբ բնականոն երթեւեկությանն անցնելու գործընթացը սկսվի, կտրվի լրացուցիչ տեղեկություն»,- ասաց նա։