Որպես առաջին այցի վայր Մոսկվայի ընտրությունն ամբողջությամբ համընկնում է հայ-ռուսական դաշնակցային, խոր արմատներ ունեցող եղբայրական հարաբերությունների և մեր երկրների եղբայրական կապերի ոգուն: Շնորհակալ եմ ՌԴ այցի հրավերի համար: Այդ մասին Մոսկվայում ՌԴ ԱԳ նախարար Սերգեյ Լավրովի հետ հանդիպմանն ասաց ՀՀ ԱԳ նախարար Արա Այվազյանը:
«Այդ ամենն արտացոլվում է մեր երկրների քաղաքացիների միջև միջանձնային և մեր միջպետական հարաբերություններում: Այդպես է եղել պատմության ընթացքում՝ հաղթանակների և ոչ միայն: Ինչպես քիչ առաջ նշեցիք, այդպես է եղել նաև Սպիտակի երկրաշարժի օրերին, որի 32-րդ տարելիցն է այսօր»,- նշեց Այվազյանը:
ՀՀ արտգործնախարարն ասաց, որ Թուրքիայի անթաքույց ռազմաքաղաքական աջակցությամբ և Մերձավոր Արևելքից վարձկան ահաբեկիչների անմիջական ներգրավմամբ՝ Ադրբեջանի կողմից Արցախի ժողովրդի հանդեպ սանձազերծված լայնածավալ պատերազմը նոր ցնցում էր:
«Առիթից օգտվելով՝ ցանկանում եմ ևս մեկ անգամ շնորհակալություն հայտնել ռուսական կողմին և անձամբ Ձեզ՝ Սերգեյ Վիկտորի, հակամարտության գոտում մարտական գործողությունների և կրակի դադարեցմանն ուղղված հետևողական ջանքերի և անձնական ներդրման համար»,- ընդգծեց Այվազյանը:
Նրա խոսքով՝ այսօր ձևավորված իրադրությունը, այդ թվում՝ տարածաշրջանային մակարդակում, պահանջում է գնահատականներ և որոշումներ, որոնք պետք է իրականանան հասարակության և ամբողջ հայ ժողովրդի համախմբման, Հայաստանի պետական կառույցների հստակ գործունեության շնորհիվ:
«Հույս ունեմ, որ կշարունակենք քննարկումները, որոնց մեկնարկը տրվել էր նոյեմբերին՝ Երևանում միջգերատեսչական պատվիրակության այցի ընթացքում»,- նշեց նախարարը:
Այվազյանն ասաց, որ պատրաստ են պատշաճ ուշադրություն ցուցաբերել այնպիսի հարցերին, ինչպիսիք են խաղաղապահների գործունեությունը, փախստականների վերադարձի համար պայմանների ստեղծումը, բնակչությանը մարդասիրական օգնության տրամադրման հետագա քայլերը, լոգիստիկ հարցերին, ինչպես նաև ենթակառուցվածքների վերականգնման և այլ կարևոր հարցերի:
«Բնականաբար, անհետ կորածների, գերիների որոնման և աճյունների փոխանակման հարցերը շատ զգայուն են, որոնք անհրաժեշտ է անհապաղ լուծել: Դա հատկապես արդիական է դառնում զիվորականների և ոչ միայն նրանց հանդեպ բառի բուն իմաստով բարբարոսական վերաբերմունքի մասին անընդհատ ստացվող փաստերի լույսի ներքո: Նման հարցերի շարքում է նաև հայկական հոգևոր-մշակութային կոթողների պահպանումը»,- ընդգծեց ՀՀ արտգործնախարարը:
