Այսօր կգումարվի 8-րդ գումարման ԱԺ-ի առաջին նիստը: Արտահերթ ընտրությամբ ձևավորված խորհրդարանում, ինչպես գիտեք, երեք ուժ է ներկայացված. ըստ էության՝ Հայաստանի վերջին երեք իշխանությունները: Այս գումարման խորհրդարանը կունենա 107 պատգամավոր, որից «Քաղաքացիական պայմանագիրը»` 71, «Հայաստան» դաշինքը` 29, «Պատիվ ունեմ»-ը` 7։ Առաջին նիստը վարելու է ամենատարեց պատգամավորը` ազգությամբ քուրդ, 76-ամյա Կնյազ Հասանովը: Այս առաքելությունը նա ստանձնելու է արդեն երրորդ անգամ:
Առաջին նիստի օրակարգն ամրագրված է օրենքով: Պատգամավորները հանդիսավոր երդմամբ կստանձնեն պարտականությունները ու նախագահ, փոխնախագահներ, հանձնաժողովների ղեկավարներ կընրեն: Իսկ վարչապետ կդառնա հաղթած ուժի թեկնածուն՝ Նիկոլ Փաշինյանը:
Օրակարգի առաջին հարցով նախատեսված՝ հաշվիչ հանձնաժողովի ձևավորումից հետո, խորհրդարանն անցնելու է Ազգային ժողովի նախագահի ընտրությանը: «Քաղաքացիական պայմանագրի»՝ Ազգային ժողովի նախագահի թեկնածուն Ալեն Սիմոնյանն է: «Հայաստան» և «Պատիվ ունեմ» դաշինքները թեկնածու չեն առաջադրել: ԱԺ նախագահն ընտրվում է պատգամավորների փակ և գաղտնի քվեարկությամբ:
Հաջորդն Ազգային ժողովի նախագահի տեղակալների ընտրության հարցն է: Խորհրդարանի նախագահի երեք տեղակալից երկուսին առաջադրում է մեծամասնությունը, երրորդին՝ խորհրդարանական ընդդիմությունը: «Քաղաքացիական պայմանագրի»՝ ԱԺ փոխնախագահների թեկնածուներն են Բարձր տեխնոլոգիական արդյունաբերության նախկին նախարար Հակոբ Արշակյանը և նախորդ գումարման խորհրդարանի Արտաքին հարաբերությունների մշտական հանձնաժողովի նախագահ Ռուբեն Ռուբինյանը: Ընդդիմադիր ուժերն ԱԺ նախագահի տեղակալի պաշտոնում թեկնածուի առաջադրման որոշման մասին դեռ չեն հայտնել:
Առաջին նստաշրջանի ընթացքում ստեղծվում են նաև խորհրդարանի մշտական հանձնաժողովները, ընտրվում դրանց նախագահները: Օրակարգում է նոր ձևավորվող կառավարության ծրագրի քննարկման հարցը: Առաջին նստաշրջանը կավարտվի Ազգային ժողովի նորընտիր նախագահի եզրափակիչ ելույթով և հերթական նստաշրջանի գումարման օրվա մասին հայտարարությամբ:
Ամբողջական օրակարգը՝ ստորև.
| Հարցի անվանումը |
Կոդը և հեղինակները |
| 1. |
Հայաստանի Հանրապետության ութերորդ գումարման Ազգային ժողովի հաշվիչ հանձնախումբ ստեղծելու մասին
|
02.08.2021--012/0
|
|
|
| |
| 2. |
Ազգային ժողովի նախագահի ընտրություն
|
02.08.2021- |
|
|
| |
| 3. |
Ազգային ժողովի նախագահի երեք տեղակալների ընտրություններ
|
02.08.2021- |
|
|
| |
| 4. |
Հայաստանի Հանրապետության ութերորդ գումարման Ազգային ժողովի մշտական հանձնաժողովներ ստեղծելու մասին
|
02.08.2021--012/0
|
|
|
| |
| 5. |
Մշտական հանձնաժողովների նախագահների ընտրություններ
|
02.08.2021- |
|
|
| |
| 6. |
Կառավարության առաջարկությամբ՝ Կառավարության կառուցվածքի փոփոխության վերաբերյալ օրենքի նախագծի քննարկում
|
02.08.2021- |
|
|
| |
| 7. |
| Կառավարության ծրագրին հավանություն տալու հարց |
|
|
Հունիսի 20-ին Հայաստանում անցկացված արտահերթ խորհրդարանական ընտրությունների քվեարկության արդյունքներով առաջատարը Նիկոլ Փաշինյանի գլխավորած «Քաղաքացիական պայմանագիր» կուսակցությունն է՝ քվեների 53,91 տոկոսով: Երկրորդը Ռոբերտ Քոչարյանի գլխավորած «Հայաստան» դաշինքն է՝ 21,09 տոկոսով, երրորդը՝ Հանրապետական ու Արթուր Վանեցյանի «Հայրենիք» կուսակցությունների «Պատիվ ունեմ» դաշինքը՝ 5,22 տոկոս. դաշինքը թեև չի հաղթահարել անցողիկ շեմը՝ 7 տոկոս, բայց որպես ամենաշատ քվե ստացած երրորդ ուժ մտնում է խորհրդարան:
