Ազգային ժողովի հերթական նիստի ընթացքում «Լուսավոր Հայաստան» խմբակցության պատգամավոր Էդմոն Մարուքյանը ԱԺ նախագահ Արարատ Միրզոյանից հետաքրքրվեց, թե ինչո՞ւ է նիստերի օրակարգից դուրս բերվել Վճռաբեկ դատարանի նախագահի և Վճռաբեկ դատարանի դատավորի թեկնածուների ընտրության վերաբերյալ հարցը։ «Մամուլում տեղեկություններ կան, որ դատավորները հրաժարվում են այս խորհրդարանի կողմից ընտրվելուն մասնակցել, կխնդրեի պարզաբանել և նաև ԲԴԽ-ից պարզաբանում պահանջել՝ նման բան կա, թե ոչ»։
Արարատ Միրզոյանն էլ տեղեկացրեց, որ այդ կապակցությամբ Բարձրագույն դատական խորհրդի նախագահից նամակ է ստացել, որից մեջբերեց կարևոր հատվածներ։
«Մենք՝ պատգամավորներս, տեղեկացվում ենք, որ թեկնածուները տեղեկացվել են նիստի վերաբերյալ հեռախոսազանգով, ինչը, ըստ երևույթին, պատշաճ չեն համարել և չեն հասցրել պատրաստվել։ Մյուս կողմից, նամակում նշվում է, որ Ազգային ժողովի լիագումար նիստում իրենց տեսլականը ներկայացնելիս թեկնածուները պետք է խոսեն դատական իշխանության հեռանկարների և համակարգի առջև ծառացած խնդիրների վերաբերյալ։ Այդ հարցերը վերաբերում են դատավորների իրավական և սոցիալական երաշխիքների ապահովմանը, դատարանների ծանրաբեռնվածությանը, նյութատեխնիկական պայմաններին և այլնին։ Սակայն հաշվի առնելով հետպատերազմյան իրավիճակը և ծառացած ավելի հրատապ լուծումներ պահանջող հարցերի շրջանակը՝ իրատեսական չէ դատական իշխանությանը հուզող այդ հիմնախնդիրների շուրջ կառուցողական և արդյունավետ քննարկում կազմակերպելը։ Այս պատճառով ԲԴԽ նախագահը իր և թեկնածուների անունից խնդրում է հարցը հետաձգել»։
ԱԺ նախագահը նշեց, որ որոշել են ընդառաջել այդ խնդրանքին և հարցի քննարկումը հետաձգել։
Նշենք, որ Վճռաբեկ դատարանի նախագահի ընտրության հարցը և Վճռաբեկ դատարանի դատավորի թեկնածուի ընտրության հարցը նախատեսվում էր քննարկել այսօրվա առաջին հիմնական նիստում։
