Դեկտեմբերի 17-ին Բրյուսելում կայանալիք ՀՀ-ԵՄ գործընկերության խորհրդի երրորդ նիստին ընդառաջ ՀՀ ԱԳ նախարար Արա Այվազյանն առանձնազրույց է ունեցել Եվրոպական հանձնաժողովի փոխնախագահ, Եվրոպական միության արտաքին գործերի և անվտանգության քաղաքականության հարցերով Բարձր ներկայացուցիչ Ժոզեպ Բորելի հետ։
ԱԳՆ լրատվական ծառայությունից հայտնում են, որ երկուստեք ընդգծվել է, որ Գործընկերության խորհրդի հերթական նիստի անցկացումը լավ հնարավորություն է՝ ամփոփելու Հայաստան-Եվրամիություն գործընկերության շրջանակներում արձանագրված ձեռքբերումները և բովանդակային քննարկումներ ծավալելու հետագա անելիքների ու ծրագրերի շուրջ:
ԱԳ նախարարի և ԵՄ Բարձր ներկայացուցչի հանդիպման առանցքային թեմաներից են եղել տարածաշրջանային անվտանգության և կայունության հարցերը: Անդրադառնալով Արցախի ժողովրդի դեմ թուրք-ադրբեջանական ագրեսիային և դրա հետևանքներին՝ Հայաստանի արտաքին քաղաքական գերատեսչության ղեկավարն անընդունելի է համարել ԱլԳ անդամ երկրի կողմից նախաձեռնության հիմքում ընկած արժեքների ոտնահարումը և Թուրքիայի գործուն աջակցությամբ Եվրամիության Արևելյան հարևանության տարածաշրջանում հակամարտությունների ուժային ճանապարհով լուծման փորձ ձեռնարկելու վտանգավոր նախադեպի ստեղծումը:
ՀՀ ԱԳՆ ղեկավարը խոր մտահոգությամբ նշել է, որ Թուրքիայի և նրա կողմից աջակցվող օտարեկրյա զինյալ ահաբեկիչների ուղիղ ներգրավվածությամբ Ադրբեջանի գործողությունները վտանգում են անվտանգային միջավայրը Արևելյան հարևանության տարածաշրջանում և աղետալի հետևանքներ կարող են ունենալ տարածաշրջանային անվտանգության համար:
Երկուստեք կարևորվել է ԼՂ խաղաղ կարգավորման հարցերի հասցեագրումը ԵԱՀԿ Մինսկի խմբի համանախագահության շրջանակներում:
ԵՄ-ին չի հաջողվել եռակողմ հանդիպում կազմակերպել Ադրբեջանի և Հայաստանի արտգործնախարարների հետ: Այս մասին հայտարարել է ԵՄ արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելը՝ մեջբերում է Интерфакс-ը:
ԵՄ դիվանագիտության ղեկավարն այս շաբաթ Բրյուսել կատարած այցի ընթացքում փորձել է եռակողմ հանդիպում անցկացնել երկու նախարարների հետ, բայց դա տեղի չի ունեցել: «Քանի որ երկու նախարարներն էլ կապ էին պահպանում ինձ հետ, մենք փորձեցինք եռակողմ հանդիպում հաստատել՝ Եվրամիությունը, Հայաստանը և Ադրբեջանը: Պարզվեց, որ դա անհնար է, ուստի ես երկու նախարարների հետ էլ առանձին եմ հանդիպելու»,- ասել է Բորելը:
Դեկտեմբերի 17-ին Բրյուսելում տեղի է ունեցել ԵՄ-Հայաստան գործընկերության խորհրդի նիստ, որին մասնակցել է ՀՀ արտաքին գործերի նախարար Արա Այվազյանը: Ուրբաթ՝ դեկտեմբերի 18-ին, տեղի կունենա ԵՄ-Ադրբեջան համագործակցության խորհրդի նիստ, որտեղ Բորելը բանակցություններ կվարի Ադրբեջանի արտգործնախարար Ջեյհուն Բայրամովի հետ:
