Այսօր շվեյցարական Ժնևի «Լա Գրանժ» դղյակում կմեկնարկի Ռուսաստանի և ԱՄՆ նախագահների սպասված հանդիպումը: Բայդեն-Պուտին գագաթնաժողովից 10 րոպե առաջ ԱՄՆ և Ռուսաստանի նախագահները կլուսանկարվեն Շվեյցարիայի նախագահի հետ: Առանձնազրույցից մեկ ժամ հետո կսկսվեն Վլադիմիր Պուտինի և Ջո Բայդենի ընդլայնված կազմով բանակցությունները, հետո արդեն հանդիպման երկրորդ փուլը: Հանդիպումը կանցկացվի փակ դռների հետևում: Կքննարկեն նաև տարածաշրջանային խնդիրները, այդ թվում՝ Լեռնային Ղարաբաղի հակամարտության կարգավորման հարցը՝ հանդիպմանն ընդառաջ հայտարարել է Ռուսաստանի նախագահի օգնական Յուրի Ուշակովը: Սպիտակ տունը հաստատել է, որ հանդիպումներից հետո Պուտինն ու Բայդենն առանձին-առանձին հանդես կգան մամուլի ասուլիսներով:
Հայտնի է, որ Ռուսաստանի ու ԱՄՆ-ի միջև պայմանավորվածություն ձեռք չի բերվել հանդիպմանը հաջորդած համատեղ մամուլի ասուլիսի վերաբերյալ:
Ռուսաստանի առաջնորդի հետ համատեղ մամուլի ասուլիս չանցկացնելու մասին նախագահ Բայդենի որոշումն առաջացրել է ԱՄՆ նախկին պետքարտուղար Մայք Պոմպեոյի դժգոհությունը, որը դա որակել է թուլության դրսևորում:
«Եթե Դուք պատրաստ չեք պարզապես կանգնել ամբիոնում և պատասխանել մամուլի հարցերին ... որոնք կարող են բարդ լինել, մինչ Ձեր հակառակորդը կանգնած է մի քանի մետր հեռու, աշխարհին տեղեկացնել, թե ինչի մասին եք խոսել, ինչ հարցեր եք կարևորել, դա մեծ թուլության նշան է»,- ասել է Պոմպեոն:
Բայդենը երեկ արդեն ժամանել է Ժնև, որտեղ հանդիպել է Շվեյցարիայի նախագահ Գի Պարմելենի հետ: Հանդիպման մեկնարկի նկարահանումից հետո լրագրողները հարցրել են Բայդենին, թե արդյո՞ք պատրաստ է վաղվա հանդիպմանը, Սպիտակ տան ղեկավարը կարճ արձագանքել է. «Ես միշտ եմ պատրաստ»: Արդեն մի քանի օր է Ժնևում անվտանգության խստագույն կանոններ են գործում: Օրեր առաջ Ժնևի երկինքը փակվել է Պուտինի և Բայդենի հանդիպման պատճառով: «Լա Գրանժ» դղյակի հարակից փողոցները ցանկապատվել են, իսկ լրատվամիջոցների համար հատուկ տարածք է հատկացվել:
