Որպես ՀՀ ԱԺ Հայաստան-Չեխիա բարեկամական խմբի նախագահ նամակ եմ հղել Չեխիայի խորհրդարանի Չեխիա-Հայաստան բարեկամական խմբի նախագահ Մարեկ Բենդային և բարեկամական խմբի անդամներին։ Այս մասին հայտնել է ՀՀ ԱԺ «Քաղաքացիական պայմանագիր» խմբակցության խմբակցության քարտուղար Արթուր Հովհաննիսյանը:
«Նամակում ներկայացրել եմ մանրամասներ Լեռնային Ղարաբաղում Ադրբեջանի կողմից կազմակերպված հումանիտար ճգնաժամի և ռազմական սադրիչ գործողությունների վերաբերյալ։
Ընդգծել եմ նաև, որ միջազգային հանրությունը պարտավոր է գործուն և հասցեական քայլեր գործարկել Հարավային Կովկասում իրավիճակը ապակայունացնելու Ադրբեջանի փորձերը կանխելու ուղղությամբ։
Հայաստանը շարունակում է հավատարիմ մնալ Հարավային Կովկասում խաղաղություն հաստատելու իր օրակարգին»,- Ֆեյսբուքի իր էջում գրել է պատգամավորը:
Ավելի վաղ ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանի գլխավորությամբ խմբակցության պատգամավորները հանդիպել են Սփյուռքի գործերի գլխավոր հանձնակատարի գրասենյակի ներկայացուցիչների հետ:
ՀՀ սփյուռքի գործերի գլխավոր հանձնակատարի գրասենյակը 2020թ.-ից իրականացնում է «իԳործ» ծրագիրը, որը մեկ տարի ժամկետով Հայաստանի Հանրապետության պետական կառավարման տարբեր ոլորտներում ներգրավում է սփյուռքահայ մասնագետների: 2022 թվականի մարտին մեկնարկել է ծրագրի երրորդ փուլը, որի շրջանակում նախատեսվում է ծրագրում ընդգրկել եւս 50 փորձագետ:
Հանդիպմանը քննարկվել են ծրագրի նպատակները, հնարավորությունները եւ գործընթացի իրականացմանն առնչվող մի շարք հարցեր:
«իԳործ» 2022 ծրագրի շրջանակում Ազգային ժողովի եւ ՀՀ սփյուռքի գործերի գլխավոր հանձնակատարի գրասենյակի միջեւ համագործակցության սկիզբ է դրվել:
