Հայաստանի ֆուտբոլի ազգային հավաքականի և իտալական «Ռոմայի» կիսապաշտպան Հենրիխ Մխիթարյանը Սկոպյեում միացել է մեր ընտրանուն: Այս մասին հաղորդում է ՀՖՖ մամուլի ծառայությունը:
«Տեսեք՝ ով է միացել ազգային հավաքականին Սկոպյեում»,- գրել է ՀՖՖ մամուլի ծառայությունը՝ հրապարակելով Մխիթարյանի մարզումային լուսանկարը:
Հիշեցնենք, որ օգոստոսի 30-ին Հայաստանի ազգային հավաքականը չարտերային թռիչքով մեկնել է Սկոպյե, որտեղ կկայանա աշխարհի 2022 թ. առաջնության որակավորման խմբային փուլի չորրորդ մրցափուլի Հյուսիսային Մակեդոնիա-Հայաստան հանդիպումը։
Հյուսիսային Մակեդոնիայի դեմ 2022թ. աշխարհի առաջնության ընտրական փուլի հանդիպումն անցկացնելու համար Սկոպյե ժամանած ֆուտբոլի Հայաստանի ազգային հավաքականն առաջին մարզումն է անցկացրել մրցավայրում: Այս մասին տեղեկացնում է ՀՖՖ մամուլի ծառայությունը:
Հյուսիսային Մակեդոնիայի մայրաքաղաքում ազգային թիմին միացել են նաև արտասահմանում հանդես եկող ֆուտբոլիստները, այդ թվում՝ իտալական «Ռոմայի» կիսապաշտպան Հենրիխ Մխիթարյանը: Ստանիսլավ Բուչնևը, Արտյոմ Ավանեսյանը և Իշխան Գելոյանը հավաքականին կմիանան օգոստոսի 31-ին, իսկ առաջիկա խաղի համար որակազրկված Վարազդատ Հարոյանը՝ սեպտեմբերի 2-ին։
Հիշեցնենք, որ Հյուսիսային Մակեդոնիա-Հայաստան հանդիպումը տեղի կունենա սեպտեմբերի 2-ին՝ Երևանի ժամանակով 22:45-ին: