ՀՀ վարչապետ Նիկոլ Փաշինյանը ուղերձով դիմել է ժողովրդին.
Այսօր լրանում է Արցախյան երկրորդ պատերազմի ռազմականգործողությունների դադարի 40-րդ օրը: Այդ պատերազմն, ըստ վարչապետի մեզ համար ծանր հետևանքներ ունեցավ, մեր բազմաթիվ հայրենակիցներ զոհվեցին մարտի դաշտում: Այս կապակցությամբ ՀՀ-ում եռօրյա սուգ է հայտարարված
Վերջին 84 օրերը մեր ժողովրդի ծանրագույն օրերի թվին են դասվում, առանց կասկածի:
«Ազգովի անցել և անցնում ենք մղձավանջի միջով: Երբեմն թվում է, թե մեր երազանքները ջարդուփշուր են եղել: Երբեմն թվում է, թե մեր լավատեսությունը փուլ է եկել, մեր ինստիտուտների գործունակությունը հայտնվել է կասկածի տակ:
Այս ամենի հետևանքով ձևավորվել է և ձևակերպվել մի մեծ հարցական. ինչ ենք անելու հաջորդիվ, ինչպես ենք ապրելու սրանից հետո, և որն է լինելու մեր նպատակը, ու թե ինչու այսպես դասավորվեց:
Ես իհարկե, ստանձնել եմ տեղի ունեցածի ամբողջական պատասխանատվությունը որը կրում եմ ի պաշտոնե: Եվ ասել եմ, որ խոնարհությամբ կընդունեմ ցանկացած դատավճիռ, որ մեր ժողովուրդը կկայացնի:
Բայց և չեմ կարող չասել. եթե քավության նոխազի ինստիտուտը լավ է սրտի հովության, զայրույթն ու ցասումը պարպելու համար, ապա ամենևին օգտակար չէ տեղի ունեցածն իր խորության և ամբողջությն մեջ հասկանալու համար: Մի բան, որ անհրաժեշտ է ապագան կառուցելու և անցյալի ճանապարհը չկրկնելու տեսակետից»,-ասաց վարչապետը:
Ըստ վարչապետի, ասվածը չի նշանակում, թե պատերազմի հանգամանքների ուսումնասիրություն չի իրականացվելու, կամ կոնկրետ դրվագներով մեղավորները չպետք է հայտնաբերվեն և պատասխանատվության ենթարկվեն: «Բայց մեզ իրականության ավելի խորը վերլուծություն է հարկավոր, որովհետև տեղի ունեցածը չէր կարող մեկ կամ մի քանի հոգու, մեկ կամ մի քանի տարվա սխալների հետևանք լինել:
Պետք է առերեսվել իրականության հետ և խոստովանել, որ մենք սխալներ ենք գործել երկար տարիներ, դրանք եղել են համակարգային, հայեցակարգային, բովանդակային: Եվ այս ամենը բերել է այնպիսի հետևանքների, որոնք սպառնալիք են ստեղծում անգամ մեր պետական ինստիտուտների համար»,-իր խոսքում նշեց Փաշինյանը: