Վարդաշենում գտնվող անօթևանների կացարանի բնակիչները բողոքի ակցիա են անցկացրել Կառավարության 3-րդ մասնաշենքի դիմաց` պահանջելով Աշխատանքի եւ սոցիալական հարցերի նախարար Նարեկ Մկրտչյանի կամ վարչապետ Նիկոլ Փաշինյանի հետ հանդիպում: Նրանք հայտնել են, որ նախարարությունը որոշում է կայացրել նրանց տեղափոխել թիվ 1 տուն-ինտերնատ, սակայն նրանք խնդրում են ևս 6 ամիս ժամանակ տալ, մինչև անօթեւաններին բնակարաններով ապահովելու ծառայությունների մատուցման նոր մրցույթ կհայտարարվի: Վարդաշենում գտնվող անօթևանների կացարանում բնակվում է 93 մարդ:
«Մենք խնդրանքով դիմում ենք վարչապետին և սոցապնախարարին, գոնե 6 ամսով երկարաձգեն պայմանագիրը մեր կազմակերպության հետ: Դրանից հետո ամառ է, մի բան կանենք»,-ասաց ակցիա իրականացնող քաղաքացիներից մեկը՝ հավելելով, որ 1 ամիս առաջ են տեղեկացել որոշման մասին և չեն ուզում տեղափոխվել այլ կացարան, իսկ եղած պայմանները իրենց բավարարում են:
