Վարչապետ Նիկոլ Փաշինյանը վաղը՝ դեկտեմբերի 19-ին, կմասնակցի հիշատակի սգո երթին։ Այս մասին «Հայկական ժամանակը» տեղեկացավ վարչապետի խոսնակ Մանե Գեւորգյանից։
«Ինչպես որ նախապես հայտարարվել էր, այդպես էլ լինելու է, վաղը վարչապետը կմասնակցի հիշատակի արարողությանը»,-ասաց խոսնակը։
Հիշատակի սգո երթը դեպի Եռաբլուր կմեկնարկի ժամը 13։00-ին՝ Հանրապետության հրապարակից։
Ավելի վաղ ՀՀ վարչապետը հայտնել էր, որ դեկտեմբերի 19-ին լրանում է ռազմական գործողությունների ավարտի 40-րդ օրը եւ այս կապակցությամբ դեկտեմբերի 19-ից Հայաստանի Հանրապետությունում եռօրյա սուգ կհայտարարվի։ Խոսքը շաբաթ, կիրակի եւ երկուշաբթի օրերի մասին է։ Անդրադառնալով հանրության շրջանում առաջացած այն հարցին՝ երկուշաբթին աշխատանքային է լինելու, թե ոչ՝ Մանե Գեւորգյանը նկատեց, որ այդ օրը ոչ աշխատանքային չի հայտարարվել։
«Երկուշաբթի աշխատանքային օրը անց կկացնեմ Սյունիքում։ Կայցելեմ Մեղրի, Կապան, Գորիս, Սիսիան՝ հանդիպելու քաղաքացիների, ՏԻՄ եւ մարզային կառույցների ներկայացուցիչների հետ»,- Ֆեյսբուքյան գրառմամբ հայտնել է ՀՀ վարչապետ Նիկոլ Փաշինյանը։