Պետություն համայնք սուբվենցիոն ծրագրերով կհիմնանորոգվեն Վանաձորի Սայաթ-Նովայի անվան քաղաքային զբոսայգին, Աղայան փողոցն ու Վանաձորի թիվ 2 գերեզմանատան գլխավոր ճանապարհը՝ մինչեւ նոր պանթեոն: Այս մասին ՀԺ-ի հետ զրույցում ասաց Վանաձորի քաղաքապետարանի քաղաքաշինության եւ ճարտարապետության բաժնի պետ Սուրեն Աբովյանը. «Ունենք նաեւ թվով 10 բազմաբնակարան շենքերի տանիքների նորոգում ու ջերմամեկուսացում: Կկառուցվի նաեւ թիվ 8 մանկապարտեզի համար նոր մասնաշենք»:
Շինարարական աշխատանքներն արդեն մեկնարկել են Սայաթ-Նովայի անվան զբոսայգում, Աղայան եւ գերեզմանատուն տանող ճանապարհների վրա:
Այս ամենից բացի, նախատեսվում է կառուցել նաեւ Վանաձորի տնակային թիվ 8 մանկապարտեզի համար նոր մասնաշենք. «Աշխատանքները կիրականացվեն 2 փուլով: Այս տարի նախատեսվում է հին տնակային մասնաշենքի քանդում, նոր մասնաշենքի հիմքի եւ առաջին հարկի երկաթբետոնե կմախքի կառուցում, մնացած աշխատանքները կշարունակվեն հաջորդ տարի»,- ասաց բաժնի պետը՝ հավելելով, որ կառուցվող նոր մանկապարտեզը նախատեսված կլինի 6 խմբի համար:
Աղայան փողոցը համարվում է Վանաձորի գլխավոր ճանապարհներից մեկը: Այն կենտրոնը կապում է «դիմաց», «Բազում» թաղամասերին ու Գուգարք գյուղին: Նշված ճանապարհով երթեւեկելը ոչ միայն քաղաքացիների, այլ նաեւ երթուղայինների վարորդների համար է գլխացավանք դարձել: Աշխատանքների ավարտը նախատեսվում է մինչեւ տարեվերջ:
Ինչ վերաբերում է Սայաթ-Նովայի անվան զբոսայգուն, ապա այն ամբողջությամբ հիմնանորոգվելու է, ցանկապատվելու: Տարիներ շարունակ զբոսայգու հետ կապված համայնքը դատական քաշքշուկների մեջ է եղել վարձակալներից մեկի հետ: Դատարանի վճռով վարձակալը վճարել է ունեցած պարտքը, ու հիմնանորոգումը մտել է սուբվենցիոն ծրագիր: Կնորոգվի ճեմուղին, կփոխվեն եզրքարերը, կլինի լուսավորության նոր ու ժամանակակից համակարգ. «Կտեղադրվեն նստարաններ, աղբամաններ, կլինի շատրվան: Բայց որ ամենակարեւորն է՝ հարավային մասում գտնվող ջրավազանը կվերակառուցվի որպես ամֆիթատրոն ու սահադաշտ կծառայի: Տարածքն ամբողջությամբ կցանկապատվի՝ խնամքն ու պահպանությունը ապահովելու համար»:
ՀԺ-ն ոլորտի պատասխանատուից մեկ անգամ էլ հետաքրքրվեց՝ դեռ 2019թ.-ին վարչապետի կողմից խոստացված Վանաձորի մի շարք ճանապարհների հիմնանորոգման ընթացքի մասին, որի մասին օրեր առաջ տեղեկատվություն տարածեց նաեւ ճանապարհային դեպարտամենտը. «Դեռ 2019թ.-ի դեկտեմբերի վերջին, երբ վարչապետի մոտ քննարկվեցին Վանաձորի զարգացման մի քանի կարեւոր ծրագեր, ներկայացվեց ու հաստատվեց նաեւ ճանապարհաշինական մասը: Ըստ դեպարտամենտի հայտարարության՝ առայժմ նախագծային աշխատանքների համար է մրցույթ հայտարարված, որից հետո արդեն կկազմակերպվի գնումների գործընթացն ու աշխատանքների մեկնարկը: Այս տարի մենք կհասցնենք ավարտել նախագծային աշխատանքները, հնարավոր է նաեւ՝ կկարողանանք կազմակերպել գնումների գործընթացը: Ձմեռային սեզոնին աշխատանքներն սկսելը նպատակահարմար չէ»: