Երկրում համավարակով պայմանավորված՝ ուսումնական տարին սկսվեց սեպտեմբերի 14-ին: Դպրոցները մինչ այդ հասցրեցին ստանալ ուղեցույցներ, որոնցով առաջնորդվելով, պետք է կազմակերպվեր ուսումնական գործընթացը: Սակայն մի հարցի շուրջ դպրոցներում խառնաշփոթ է ստեղծվել: Անհասկանալի է մնացել տարրական դասարաններում երգի դասի կազմակերպման ձևը:
Մինչ ուսումնական տարին սկսվելը ԿԳՄՍ նախարար Արայիկ Հարությունյանը հարցազրույցներից մեկում ասել էր, որ կկազմակերպվի երգեցողության դասերի միայն տեսական մասը, դասի ժամանակ երեխաները չեն երգի:
Հրապարակված ուղեցույցում, սակայն, նման արգելք չկար: Ըստ այդմ, որոշ դպրոցներ ականջալուր եղան նախարարի խոսքին, և դասաժամերն անցկացնում են առանց երգեցողության: Որոշ դպրոցներ առաջնորդվեցին ուղեցույցով, և երեխաներն առաջին իսկ օրից երգեր են կատարում դասարաններում:
Իրականում ո՞ր տարբերակն է ճիշտ:
ՀՀ ԿԳՄՍՆ Հանրակրթության վարչության փորձագետ Արտաշես Թորոսյանը ՀԺ-ի հետ զրույցում նշեց, որ երգի դասերը պետք է կազմաեկրպվեն՝ հնարավորությունները հաշվի առնելով:
«Այն աշխատանքը, որը ծրագրով նախատեսված է, բայց հնարավոր չէ կազմակերպել՝ հակահամաճարակային կանոնները պահպանելով, չի իրականացվում: Երգել, թե ոչ՝ պետք է որոշեն երգեցողության ուսուցիչները: Եթե երեխաները կարող են դիմակներով երգել, ապա դա հնարավոր է կազմակերպել: Բայց երգեցողության դասն ունի նաև տեսական բաղադրիչ, և դասի ժամանակ երաժշտական դպրոցի ֆունկցիաներ չեն կատարվում, այլ հանրակրթական»,- ասաց Արտաշես Թորոսյանը:
Վերջապես, կարո՞ղ ենք ասել, որ երգի դասին արգելված չէ երգելը: Նախարարության փորձագետի պատասխանը հստակ է՝ իհարկե, եթե դրա համար անհրաժեշտ չէ հանել դիմակը:
