«Լուրերի» հարցին, թե հակառակորդի հրետակոծության հետևանքով քանի՞ տուն վերականգնման ենթակա չէ, Տավուշի մարզպետ Հայկ Չոբանյանը նշեց.
«Նախորդ օրերի վնասված տների քանակը մոտ 20 է: Կան տարբեր բնույթի վնասներ, և ուղղակի ասել, որ այդ տները վերանորոգվելու են, կարող է մի փոքր բարձր հնչել, կան նաև փոքր վնասներով տներ: Այս գիշերից հետո առկա է վնասված ևս 10 տուն: Ընդհանուր առմամբ, մենք խոսում ենք այս պահին 30 առանձնատների մասին: Նախնական ուսումնասիրությամբ՝ ունենք առնվազն երկու տուն, որոնք ոչ թե կվերականգնվեն, այլ զրոյից կկառուցվեն»,- ասաց մարզպետը:
Հիշեցնենք, որ մարզպետը տեղեկացրեց, որ առավոտյան Կառավարության հետ քննարկումներ են ունեցել, և ստեղծվել է հրետակոծված բնակավայրերի շինությունների գնահատման, գույքագրման հանձնաժողով, որն ամենօրյա տեղեկատվություն պետք է փոխանցի վնասների չափի վերաբերյալ: Վաղվանից պետք է սկսեն զբաղվել այդ տների վերականգնման աշխատանքներով: Այն բնակարանները, որոնց վերականգնումը նպատակահարմար չի լինի, կկառուցվեն նորերը:
Այս պահին Տավուշում հարաբերական անդորր է: Համայնքներում խուճապ չկա, իրավիճակը կայուն է՝ հսկողության ներքո: Այս մասին Իջևանի լրատվական ճգնաժամային կենտրոնում ասաց Տավուշի մարզպետը:
Հայկ Չոբանյանն ասաց, որ վաղ առավոտյան վերսկսվել են Տավուշի սահմանապահ գյուղերի ռմբակոծությունները: Հիմնական թիրախ են եղել՝ Այգեպար, Ներքին Կարմիրաղբյուր, Չինարի, Մովսես, Տավուշ գյուղերը և Բերդ քաղաքը: Առավոտյան տվյալներով՝ բնակավայրերում վնասվել են 10-ից ավելի առանձնատներ, ինչպես նաև որոշ ենթակառուցվածքներ:
«Առանձնահատուկ ուզում եմ նշել սահմանապահ Այգեպարի մանկապարտեզի ռմբահարումը: Վնասվել է ջրագիծ՝ Տավուշ Ներքին Կարմիրաղբյուր հատվածում, որի վերականգնման աշխատանքները ընթացքի մեջ են: Վաղ առավոտյան մոբիլիզացվել են մարզի քաղպաշտպանության բոլոր խմբերը, և ինտենսիվ աշխատանքներ են ընթանում բոլոր ուղղություններով մեր բնակիչների անվտանգությունն ապահովելու համար: Հայտարարել ենք ներքին մոբիլիզացիա, մասնավորապես, պատսպարման առումով: Մեր քաղաքացիները հիմնականում այդ ընթացքում գտնվել են ապաստարաններում և նկուղներում: Բարեբախտաբար, քաղաքացիական բնակչության մեջ վիրավորներ և զոհեր չունենք»,- ասաց մարզպետը՝ շնորհակալություն հայտնելով քաղաքացիներին՝ կազմակերպված գործելու համար:
Մարզպետը տեղեկացրեց, որ առավոտյան Կառավարության հետ քննարկումներ են ունեցել, և ստեղծվել է հրետակոծված բնակավայրերի շինությունների գնահատման, գույքագրման հանձնաժողով, որն ամենօրյա տեղեկատվություն պետք է փոխանցի վնասների չափի վերաբերյալ: Վաղվանից պետք է սկսեն զբաղվել այդ բնակարանների վերականգնման աշխատանքներով: Այն բնակարանները, որոնց վերականգնումը նպատակահարմար չի լինի, կկառուցվեն նորերը:
Աղբյուր՝ 1lurer.am