Խարկովում Հայաստանի Հանրապետության պատվավոր հյուպատոսի օգնական Համլետ Հովհաննիսյանը «Ռադիոլուր»-ին ասել է, որ այս պահին էլ դեռ ապաստարաններում հայ ընտանիքներ կան։
Քաղաքում աշխատում են փոքրաթիվ խանութներ, որոնցում, սակայն, պարենային ապրանքների պաշարը սպառվում է։ Դժվարությամբ, բայց դեռ հաջողվում է մարդկանց տարհանել, չնայած քաղաքից դուրս եկող մայրուղում մի քանի կիլոմետր ձգվող խցանումներ են՝ պատմում է Հովհաննիսյանը։
«Խարկովը շատ մեծ վնասներ է կրել, ենթակառուցվածքներ են վնասվել, բնակելի տներ։ Շատ խնդիրներ այս պահին դեռ մնում են չլուծված, սննդի խնդիր կա, դեղորայքի, ջրի։ Որոշ խանութներ օրվա ընթացքում բացվում են, բայց ապրանքները քիչ են, և մարդիկ ստիպված են երկար հերթ կանգնել։ Կան մարդիկ, որոնք չեն էլ կարողանում ապաստարաններից դուրս գալ, որ խանութներից օգտվեն»,– նշում է հյուպատոսի օգնականը։
Ըստ նրա՝ մեծ թվով հայեր արդեն դուրս են եկել Խարկովից, բայց շատ են նաև քաղաքում մնացածները, որոնք բազմաթիվ խնդիրներ ունեն։
