ՀՀ ԱԺ պաշտպանության եւ անվտանգության հարցերի մշտական հանձնաժողովն Անդրանիկ Քոչարյանի նախագահությամբ սեպտեմբերի 28-ին հրավիրած արտահերթ նիստում քննարկել է մշտական հանձնաժողովի նախագահի տեղակալի ընտրության մասին հարցը: ԱԺ «Հայաստան» խմբակցությունը դարձյալ առաջադրել է Արթուր Ղազինյանի թեկնածությունը: Նա առաջարկել է ստեղծել ենթահանձնաժողով, որը կուսումնասիրի նախորդ տարվա հոկտեմբերի 7-ին պատերազմը չդադարեցնելու հանգամանքները:
Անդրանիկ Քոչարյանը պարզաբանել է, որ ԱԺ կանոնակարգ սահմանադրական օրենքի համաձայն` արտահերթ նիստի օրակարգում չի կարող ընդգրկվել որեւէ այլ հարց: Ընդդիմադիր պատգամավորները, բացառությամբ «Պատիվ ունեմ» խմբակցության անդամ Տիգրան Աբրահամյանի լքել են նիստերի սրահը:
ԱԺ «Քաղաքացիական պայմանագիր» խմբակցության պատգամավորները դեմ են քվեարկել թեկնածուին:
Պատգամավորները քննարկել են նախագահի բացակայության ժամանակ հանձնաժողովի նիստը վարողի ընտրության վերաբերյալ հարցը: Որոշվել է, որ մշտական հանձնաժողովի նախագահի բացակայության ժամանակ նիստերը պետք է վարի հանձնաժողովի անդամ Արմեն Խաչատրյանը:
Անդրանիկ Քոչարյանը տեղեկացրել է, որ առաջիկայում նախատեսվում է փոփոխություն կատարել «ԱԺ կանոնակարգ» սահմանադրական օրենքում, որով նույն թեկնածուի երկու անգամ առաջադրվելու եւ չընտրվելու դեպքում խմբակցությունը պետք է առաջադրի մեկ այլ թեկնածուի:
