Մի խումբ սյունեցիներ վաղ առավոտից մեքենաներով փակել են Գորիս-Տաթև ավտոճանապարհը՝ խոչընդոտելու վարչապետ Նիկոլ Փաշինյանի մուտքը: Ակցիային մասնակցում են նաև Գորիսի քաղաքապետի տեղակալներ Մենուա Հովսեփյանը և Իրինա Յոլյանը: Նրանք փորձել են ավտոերթով հասնել Սյունիքի դարպասներ, սակայն ոստիկանությունը փակել է նրանց ճանապարհը: Ոստիկանությունն էլ գտնվում էր Գորիսի ելքի մոտ՝ արգելելով քաղաքացիներին դուրս գալ քաղաքից և իրականացնել իրենց ակցիան: Սյունեցիների ու ոստիկանության միջև քաշքշուկ ու ծեծկռտուք է տեղի ունեցել։
Ըստ տեղեկությունների՝ հարուցված քրեական գործի շրջանակներում ՀՀ ոստիկանությունը բերման է ենթարկել Գորիսի քաղաքապետ Առուշ Առուշանյանին: «Արմենպրես»-ի հետ զրույցում՝ այս մասին հայտնեցին ՀՀ ոստիկանության հասարակայնության հետ կապերի և լրատվության վարչությունից: «Հարուցված քրեական գործի շրջանակներում քաղաքապետը բերման է ենթարկվել»,- նշեցին ոստիկանությունից, չմանրամասնելով, թե ինչ քրեական գործի շրջանակներում է Գորիսի քաղաքապետը բերման ենթարկվել՝ նշելով, որ գործը փոխանցվել է քննչական կոմիտե: Քննչական կոմիտեից ևս մանրամասներ չհայտնեցին:
Նշենք՝ վարչապետն այսօր այցելելու է Սյունիքի մարզ՝ հանդիպելու և զրուցելու սյունեցիների հետ, պատասխանելու նրանց մտահոգող հարցերին: ՀՀ վարչապետ Նիկոլ Փաշինյանը «Ֆեյսբուք»-ի ուղիղ եթերի ժամանակ հայտնել է, որ Սյունիքի մարզ իր այցը կրքեր բորբոքելու համար չէ: