Interlur.com լրատվական գործակալությունը ՌԴ-ում ՀՀ դեսպանատան լրատվական ծառայությունից տեղեկացավ, որ դեսպանատունը Ռուսաստանում ադրբեջանցիների սադրանքների հետ կապված հայտարարություն է տարածել, որում մասնավորապես ասվում է․
Վերջին օրերին մենք շարունակում ենք արձանագրել ադրբեջանական կողմի հայ-ադրբեջանական սահմանին լարված իրավիճակը Ռուսաստանի Դաշնության տարածք փոխանցելու և երկու ժողովուրդների համայնքների միջև կոնֆլիկտ ստեղծելու ուղղությամբ փորձեր:
Մասնավորապես, այս դրսևորումները տեղի են ունենում Մոսկվայի և Ռուսաստանի այլ քաղաքների առևտրատնտեսական հարթակներում, որոնք այս կամ այն կերպ կապված են Ադրբեջանի իշխանությունների հետ: Անցած գիշերվա իրադարձությունները, որոնք ուղեկցվեցին բազմաթիվ սադրանքներով, ինչպես նաև հայերի վրա հարձակումը ևս մեկ անգամ ցույց են տալիս ադրբեջանական կողմի գործողությունների միտումնավոր բնույթը: Այս սադրանքների նպատակն է խաթարել Ռուսաստանում ազգամիջյան ներդաշնակության հիմքերը, նպաստել բազմազգ հասարակության մեջ լարվածության աճին և երկրում հակամարտող իրավիճակների նախադեպեր ստեղծել:
Դեսպանությունը, Ռուսաստանի հայերի միությունը և այլ կառույցներ տեղեկացրել են Ռուսաստանի Դաշնության համապատասխան մարմիններին այդ գիշեր տեղի ունեցած իրադարձությունների, ինչպես նաև սադրանքների այլ փորձերի մասին: Մենք հավատում ենք, որ հետագա զարգացումներից խուսափելու համար պետք է անհապաղ միջոցներ ձեռնարկել, որպեսզի իրավիճակը կարգավորվի: Ռուսաստանի տարածքում տեղակայված տնտեսվարող սուբյեկտները, անկախ ազգությունից և քաղաքացիությունից, պետք է համապատասխանեն Ռուսաստանի Դաշնության օրենքներին:
Միևնույն ժամանակ, ելնելով ստեղծված իրավիճակից և հայկական համայնքը զանազան սադրիչ գործողություններում ներգրավելու փորձերից մենք մեր հայրենակիցներին խնդրում ենք լինել զգոն, զսպված և չտրվել սադրանքներին, չմասնակցել տարբեր կողմերի գործողություններին կամ նախաձեռնություններին, որոնք կազմակերպվել են ի պատասխան ադրբեջանական կողմի սադրանքներին: Մենք շարունակում ենք աշխատել ծագած խնդիրները լուծելու ուղղությամբ՝ հավատարիմ մնալով ազգամիջյան հանգստությունը պահպանելու սկզբունքին:
Ցանկացած սադրիչ դրսևորումների առկայության դեպքում խնդրում ենք անմիջապես ահազանգել դեսպանատան, Ռուսաստանի հայերի միության և այլ կառույցների թեժ գծերին, ինչպես նաև կապ հաստատել իրավապահ մարմինների հետ:
Թեժ գծի համարներ.
Ռուսաստանի Դաշնությունում ՀՀ դեսպանություն - հեռ. + 7 (966) 118-89-84
Ռուսաստանի հայերի միություն - հեռ. +7 (916) 417-88-82
||| Заявление Посольства Армении в России В последние дни мы продолжаем фиксировать попытки азербайджанской стороны...
Опубликовано Посольство Армении в России/ՌԴ-ում ՀՀ դեսպանություն Пятница, 24 июля 2020 г.