ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանը սեպտեմբերի 17-ին հանդիպեց Եվրոպայի խորհրդի երեւանյան գրասենյակի ղեկավարի տեղակալ Լորանս Լվոֆի եւ Եվրոպայի խորհրդի Երեւանյան գրասենյակի «Մարդու իրավունքները կենսաբժշկության մեջ» ծրագրի ղեկավար Մերի Կատվալյանի հետ:
Լորանս Լվոֆի ներկայացմամբ՝ 2020 թվականից Եվրոպայի խորհուրդը Հայաստանի հետ համագործակցում է նաեւ կենսաբժշկության ոլորտում:
Մերի Կատվալյանը հանձնաժողովին ներկայացրեց կատարված աշխատանքները՝ նշելով, որ ծրագրի նպատակն է բարձրացնել իրազեկվածությունը եվրոպական չափորոշիչների հիմնական սկզբունքների վերաբերյալ, ինչպես նաեւ այդ չափորոշիչների համակարգումն ու ներդրումն առողջապահության օրենսդրության բնագավառում:
Թագուհի Թովմասյանը շնորհակալություն հայտնեց համապարփակ տեղեկատվություն տրամադրելու կապակցությամբ՝ կարեւորելով ծրագրի իրականացումը: Նա անդրադարձավ պարտադիր պատվաստման, ինչպես նաեւ քրեակատարողական հիմնարկներում եւ փակ տարածքներում գտնվող մարդկանց առողջության, իրավունքների խնդիրներին:
Լորանս Լվոֆը նշեց, որ բարձրացված հարցերը Հայաստանին ներհատուկ խնդիրներ չեն, եւ այն պետք է դիտարկել պատասխանատվության տեսանկյունից: Ըստ նրա՝ Եվրոպայի խորհուրդը ոչ թե որոշակի բանաձեւ է առաջարկում, այլ ամբողջական տեղեկատվություն տրամադրելով` օգնում, որ յուրաքանչյուր երկիր իրեն նպատակահարմար ճանապարհն ընտրի:
Կողմերը մտքեր փոխանակեցին բժշկական գաղտնիքի պահպանմանը, օրգանների փոխպատվաստմանը վերաբերող հարցերի շուրջ:
Առաջիկայում աշխատանքային քննարկումներ կազմակերպելու պայմանավորվածություն ձեռք բերվեց:
