Սեպտեմբերի 17-ին ՀՀ ԱԺ աշխատանքի եւ սոցիալական հարցերի մշտական հանձնաժողովի անդամները հանդիպում ունեցան «Աշխատանքային իրավունքներ» կոնսորցիումի անդամ հասարակական կազմակերպությունների ներկայացուցիչների հետ՝ քննարկելու նրանց կողմից իրականացվող «Տվյալահեն քաղաքականությունների բարելավման գործընթացն աշխատանքային իրավունքների ոլորտում» ծրագիրը: Այն մաս է կազմում «Տվյալներ հաշվետու եւ թափանցիկ գործունեության համար» (ԴԱՏԱ) ծրագրի, որն իրականացվում է մեկ այլ կոնսորցիումի կողմից ԱՄՆ Միջազգային զարգացման գործակալության միջոցով: Ինչպես նշեց «Արմավիրի զարգացման կենտրոն» հասարակական կազմակերպության նախագահ Նաիրա Առաքելյանը, ծրագրի նպատակը գործատու-աշխատող հարաբերությունները բարելավելն է՝ դրանք դարձնելով իրավահարաբերություններ, ինչով էլ կպաշտպանվեն քաղաքացիների աշխատանքային իրավունքները:
Ծրագրի շրջանակում Հայաստանի մարզերում իրականացվելու են իրազեկման աշխատանքներ եւ հետազոտություններ՝ պարզելու համար, թե որքանով են պաշտպանված աշխատողների իրավունքները: Ըստ բանախոսի՝ ոլորտում շատ են անելիքները, ուստի անհրաժեշտություն կա նաեւ իրականացնելու օրենսդրական բարեփոխումներ: Հյուրերի տեղեկացմամբ՝ ծրագրի շրջանակում սոցհարցումներ են անցկացվելու մի քանի հարյուր վարձու աշխատողների շրջանում՝ պարզելու, թե որքանով են պաշտպանված նրանց աշխատանքային իրավունքները: Ծրագրի մասնակիցները համագործակցում են Առողջապահական եւ աշխատանքի տեսչական մարմնի, ինչպես նաեւ արհմիությունների եւ գործատուների հետ: Կոնսորցիումն աշխատանքի ավարտին պատրաստելու է զեկույց, որը կներկայացվի նաեւ խորհրդարանական հանձնաժողովին: Ծրագրի տեւողությունը մեկ տարի է: Առողջապահական եւ աշխատանքի տեսչական մարմնի ղեկավար Հակոբ Ավագյանն անդրադարձավ ոլորտի խնդիրներին՝ նշելով, որ անհրաժեշտ է հասնել այնպիսի կարգավորման, որ Հայաստանում կնքվող աշխատանքային պայմանագրերը լինեն էլեկտրոնային եւ դրանք րոպեների ընթացքում հասանելի լինեն տեսչական մարմնին: Ուստի անհրաժեշտ է կատարել օրենսդրական փոփոխություններ: Որպես այդ աշխատաոճի լավագույն փորձ նշվեց հարկային մարմիններին էլեկտրոնային հաշվետվությունների ներկայացումը:
Հանձնաժողովի նախագահ Հերիքնազ Տիգրանյանը հանձնաժողովի անունից պատրաստակամություն հայտնեց աջակցելու այն բոլոր ծրագրերին, որոնք ուղղված կլինեն օրենսդրության կատարելագործմանն ու քաղաքացիների աշխատանքային իրավունքների պաշտպանությանը:
Պատգամավորները բարձրացրին նաեւ սեզոնային եւ այլ ժամանակավոր աշխատանքներ կատարող քաղաքացիների աշխատանքային իրավունքների պաշտպանության հարցերը՝ կարեւորելով դրանց կարգավորումը:
Քննարկման մասնակիցներն անդրադարձան ոլորտում առկա խնդիրներին, անհրաժեշտ համարեցին դրանց լուծմանն ուղղված քայլերի իրականացումը: Որոշվեց նաեւ, որ Առողջապահական եւ աշխատանքի տեսչական մարմինը պարբերաբար հանձնաժողովին կներկայացնի վիճակագրություն, որում ամփոփված կլինեն քաղաքացիների աշխատանքային իրավունքների խախտման վերաբերյալ տվյալները:
