Մի խումբ անձինք վաղ առավոտյան կաթվածահար են արել Երեւանի մետրոպոլիտենի մի քանի կայարաններում աշխատանքը վարչապետ Նիկոլ Փաշինյանի հրաժարականի պահանջով, իսկ «Գործարանային» կայարանում բախում է տեղի ունեցել մետրոյով երթեւեկող քաղաքացիների եւ մուտքերը փակած անձանց միջեւ: Երևանի մետրոպոլիտենի մամուլի խոսնակ Տաթև Խաչատրյանը տեղեկացրեց, որ քաղաքացիական անհնազանդության ակցիաների շրջանակում այսօր՝ ժամը 09:08-ին, կաթվածահար է եղել Կարեն Դեմիրճյանի անվան Երևանի մետրոպոլիտենի բնականոն երթևեկությունը։
«Մետրոպոլիտենի կայարաններում քաղաքացիները իրականացնում են անհնազանդության ակցիա՝ խափանելով մետրոպոլիտենի երթևեկությունը։ Բնականոն աշխատանքին անցնելուն պես կտրվի լրացուցիչ ինֆորմացիա»,- գրել էր նա։
Աշխատանքի շտապող քաղաքացիները վեճի բռնվեցին մուտքերը փակածների հետ, պահանջեցին թողնել մետրոյի աշխատանքն ընթանա բնականոն հունով. մեկը շտապում էր աշխատանքի, մյուսը՝ դեղ էր հասցնում հիվանդին: Որոշ ժամանակ մետրոն չաշխատեց այս կայարանում, դռները փակվեցին, քաղաքացիներին վագոններից դուրս հանեցին: Կարճ ժամանակ անց, սակայն, ոստիկանության աշխատակիցների կողմից ցուցարարները հեռացվեցին, եւ մետրոպոլիտենի աշխատանքը վերականգնվեց: Աշխատանքի շտապող քաղաքացիները ծափահարում էին ոստիկանության աշխատակիցներին: Նույն իրավիճակն է եղել այլ կայարաններում եւս:
Երևանի մետրոպոլիտենի մամուլի քարտուղար Տաթև Խաչատրյանը տեղեկացրեց, որ ժամը 09:45-ի դրությամբ Կարեն Դեմիրճյանի անվան Երևանի մետրոպոլիտենի աշխատանքը վերսկսվել է:
ԹԱՐՄԱՑՈՒՄ․
Ոստիկանության Շենգավիթի բաժնում քրեական գործ է հարուցվել Երևանի Կարեն Դեմիրճյանի անվան մետրոպոլիտենի «Գործարանային» կայարանում դեկտեմբերի 11-ին տեղի ունեցած դեպքի առթիվ։
«Դեկտեմբերի 11-ին, ժամը 9․30-ի սահմաններում, Երևանի մետրոպոլիտենի «Գործարանային» կայարանում մի խումբ անձինք, իրացնելով ակցիա իրականացնելու, հավաքներ կազմակերպելու և անցկացնելու իրենց իրական կամ ենթադրյալ իրավունքները, տևական ժամանակ խոչընդոտել են գնացքների բնականոն աշխատանքը՝ քաղաքացիներին զրկելով ազատ տեղաշարժվելու իրենց սահմանադրական իրավունքի իրացման հնարավորությունից, ինչի հետևանքով էական վնաս է պատճառվել անձանց իրավունքներին, օրինական շահերին, ինչպես և պետության ու հասարակության շահերին։ Դեպքի առթիվ ոստիկանության Շենգավիթի բաժնում քրեական գործ է հարուցվել, որն ուղարկվել է տարածքային քննչական բաժին»,- ասվում է հաղորդագրության մեջ։
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
