«Հայաստան» դաշինքի պատգամավոր Գեղամ Նազարյանը ԱԺ-Կառավարություն հարցուպատասխանի ժամանակ նկատեց՝ երկու շաբաթ առաջ հանդիպել են զոհված և գերի ընկած զինծառայողների ծնողների հետ:
«Այդ հանդիպման ժամանակ մենք արձանագրեցինք, որ մինչգերատեսչական հանձնաժողով չի ստեղծվել, որը կզբաղվի անհետ կորած տղաների հարցերով: Երկու շաբաթ անցել է, կրկին չկա այդ հանձնաժողովը: Ի՞նչն է պատճառը, որ լուրջ մարմին չստեղծվեց, որ անհետ կորածների հարցերով կզբաղվեր: Միգուցե նրանց ծնողները խանգարո՞ւմ են գունագեղ միջոցառումներ անցկացնել»,- նշեց պատգամավորը:
ՀՀ վարչապետ Նիկոլ Փաշինյանը հայտնեց, որ ինքը տասնյակից ավելի հանդիպումներ է ունեցել անհետ կորածների հարազատների հետ, որոնք չեն լուսաբանվել:
«Անհետ կորածների հարցերով զբաղվող մարմին կա: Ես ինքս եմ այդ հարցերը համակարգում: Ամենաբարձր մակարդակով ամեն բան արվում է»,- հայտնեց վարչապետը:
Գունագեղ միջոցառմանն էլ անդրադառնալով՝ Նիկոլ Փաշինյանը ներողություն խնդրեց այն մարդկանցից, որոնց զգացմունքները վիրավորվել են նման ձևակերպման պատճառով:
«Բայց ես ասել եմ՝ մեր տրամադրությունը տոնական չէ, բայց կա նաև այլ խնդիր. ՀՀ-ն 30 տարեկան է: Ես չեմ կարծում, որ մենք պետք է չեղարկենք միջոցառումը: Նախատեսվող միջոցառման առանցքը հենց մեր նահատակների հիշատակի ընդգծումն է: Սեպտեմբերի 21-ին հայտարարվելու է Հայաստանի անկախության և արցախյան երեք պատերազմներում և պատերազմից դուրս մարտական հերթապահության ընթացքում իրենց կյանքը զոհած մեր եղբայրների հիշատակը հավերժացնող մի մասշտաբային նախագծի մասին, որի շուրջ մենք քննարկումներ ենք իրականացնում շուրջ 6 ամիս»,- ասաց ՀՀ վարչապետը:
