«Ես հիմա կարող եմ ձեզ ցույց տալ, թե ինչ մեծ տեմպերով է ընթանում խաղողի մթերումը մի շարք գործարաններում: Որոշ մթերողներ հայտարարել են անսահմանափակ խաղողի մթերման մասին: Դրանցից մեկը Պռոշյանի գինու գործարանն է, հայտարարել է՝ ինչքան բերեն, էդքան կմթերի»:
Այս մասին Կառավարության նիստից հետո ճեպազրույցի ժամանակ ասաց Էկոնոմիկայի նախարար Վահան Քերոբյանը՝ անդրադառնալով խաղողի մթերմանը:
Քերոբյանը նաեւ շեշտեց՝ եթե չեն խառնվում կարտոֆիլի, լոլիկի գնին կամ որեւիցե այլ ապրանքի գնին, ինչո՞ւ պիտի խառնվեն խաղողի գնին. դրանք շուկայական հարաբերություններ են: Ըստ նախարարի, սակայն, եթե լինեն չարաշահումներ, ապա դրա համար գոյություն ունի Տնտեսական մրցակցության պաշտպանության պետական հանձնաժողովը, որը կարգելի ցանկացած չարաշահում:
Կառավարության նախորդ նիստից հետո Կառավարության շենքի մոտ բողոքի գնացած քաղաքացուն Քերոբյանը խորհուրդ էր տվել սնանկ ճանաչվել: Քաղաքացին, որը չէր կարողանում վճարել իր վարկերը, օգնություն էր խնդրում:
Լրագրողների դիտարկմանը, թե պետական պաշտոն զբաղեցնող անձին հարիր չէ նման խորհուրդներ տալը, եւ ի՞նչ կարծիք կունենան բանկերը բարձրաստիճան պաշտոնյայի մասին, Քերոբյանն ասաց. «Փիլիսոփայական մակարդակի վրա այս խնդիրը կոչվում է սխալվելու իրավունք. արդյոք Հայաստանում մարդն ունի՞ սխալվելու իրավունք: Արդյոք մեր հասարակությունը կամ կարգավորումներն ունա՞կ են ներել մարդուն գործած սխալի համար»:
Դիտարկմանը՝ արդյոք հիփոթեքային վարկեր տրամադրելը ռիսկային չի դառնա վարկատուների համար, Քերոբյանն ասաց. «Պետք չէ մոռանալ այն հնարավորությունների մասին, որն օրենքը թույլ է տալիս անելանելի իրավիճակներում»: