Ազգային ժողովը մարտի 4-ին առաջին ընթերցմամբ քննարկել է «ՀՀ հարկային օրենսգրքում փոփոխություններ եւ լրացումներ կատարելու մասին» օրենքի նախագիծը: Այն ներկայացրել է ՊԵԿ նախագահի տեղակալ Արթուր Մանուկյանը:

Նախագծի նպատակը ՀՀ հարկային օրենսգրքի կիրառման ընթացքում առաջացած հարցերի կանոնակարգումն ու հստակեցումն է, ինչպես նաեւ   օրենսգրքի առանձին դրույթների վերանայումը, դրանցում բովանդակային, խմբագրական փոփոխություններ կամ լրացումներ կատարելն ու նոր կարգավորումներ սահմանելը:

Առաջարկվում է ուժը կորցրած ճանաչել մի շարք դրույթներ, նախատեսվում է հստակեցնել, որ հանրային սննդի ծառայությունների մատուցման դեպքում ՀԴՄ կտրոնի վրա պետք է տպագրված լինի նաեւ փաստացի մատուցվող ծառայության շրջանակներում տրամադրվող ճաշացուցակը (կերակրատեսակների, խոհարարական արտադրատեսակների, խմորեղենի եւ հացաբուլկեղենի, գնվող այլ ապրանքների անվանումները):

ՊԵԿ նախագահի տեղակալ Արթուր Մանուկյանը նշել է, որ առաջարկվում է բարձրացնել տուգանքների համար սահմանված նվազագույն շեմերը` 1-ին դեպքի համար` 200 հազար դրամի փոխարեն սահմանել 500 հազար դրամ, 2-րդ դեպքի համար` 500 հազար դրամի փոխարեն` 2 միլիոն դրամ, 3-րդ եւ ավելի դեպքերի համար` 1 միլիոն դրամի փոխարեն` 10 միլիոն դրամ:

Առաջարկվում է սահմանել ՀԴՄ չկիրառելու համար կիրառվող տուգանքի մեկ միասնական մեծություն` անկախ տարվա ընթացքում կատարված խախտման քանակից եւ գործունեության ոլորտից:

ԱԺ տնտեսական հարցերի մշտական հանձնաժողովի անդամ Հովիկ Աղազարյանը ներկայացրել է հանձնաժողովի դրական եզրակացությունը: Կարեւորելով նախագծի ընդունումը` պատգամավորը գործընկերներին հորդորել է կողմ քվեարկել նախագծին:

Երկրորդ ընթերցմամբ քննարկվել է ««Քաղաքաշինության մասին» օրենքում լրացումներ կատարելու մասին» օրենքի լրամշակված նախագիծը:

Գլխադասային հանձնաժողովի դրական եզրակացությունը ներկայացրել է Հայկ Ցիրունյանը: