Արդարադատության նախարար Կարեն Անդրեասյանը պարզաբանեց, թե ինչու է Սահմանադրական բարեփոխումների խորհրդի նիստին ներկա վարչապետ Նիկոլ Փաշինյանի օգնական Աննա Վարդապետյանը։ Լրագրողների հետ ճեպազրույցում Անդրեասյանը նշեց, որ Սահմանադրական բարեփոխումների խորհուրդը ձևավորվել է վարչապետի կողմից և խորհրդի աշխատանքի արդյունքները պետք է ներկայացվեն վարչապետին։
«Մեր խորհուրդը ձևավորվել է վարչապետի կողմից և, որքան էլ այնտեղ կան անկախ մարմիններ, անկախ մարդիկ, կուսակցություններ, հասարակական կազմակերպություններ, ըստ մեր Սահմանադրության գործընթացների, այս աշխատանքի արդյունքը պետք է անպայման գնա գործադիր, հետո օրենսդիր, այնուհետև պետք է գնա Սահմանադրական դատարան։ Եվ եթե այս գործընթացներում ի սկզբանե չներգրավեինք նաև վարչապետի իրավական հարցերով օգնականին, հետո մենք ստիպված էինք լինելու նաև նրան առանձին այս գործընթացները ներկայացնել, որովհետև Վարդապետյանը պետք է այս ամենը ներկայացնի վարչապետին։ Հետևաբար` Վարդապետյանի ներկայությունը առանց քվեարկության և ձայնի իրավունքի մեզ համար շատ օգտակար է»,- ասաց Անդրեասյանը։
