Հանրապետության նախագահ Արմեն Սարգսյանն այսօր հանդիպել է վարչապետ Նիկոլ Փաշինյանի հետ: Հանդիպումը տեղի է ունեցել Հանրապետության նախագահի նախաձեռնած քննարկումների շրջանակում: Այս մասին հայտնում է ՀՀ նախագահի պաշտոնական կայքը:
Նախագահը և վարչապետը քննարկել են երկրում ստեղծված իրավիճակը, այն հանգուցալուծելու և ներքաղաքական ճգնաժամը հաղթահարելու ուղիները: Այդ համատեքստում որպես լուծում անդրադարձ է կատարվել խորհրդարանական արտահերթ ընտրությունների անցկացմանը:
Նշենք, որ այդ ընթացքում «Հայրենիքի փրկության շարժում» նախաձեռնության անդամները բողոքի ակցիա են անցկացրել նախագահ Արմեն Սարգսյանի նստավայրի դիմաց: Այդկերպ նրանք իրենց բողոքն են հայտնել ՀՀ նախագահի և վարչապետի՝ այսօր նախատեսված հանդիպման դեմ: Ավելի վաղ «Հայրենիքի փրկության շարժման» մի խումբ անդամներ բողոքի ակցիա էին անցկացրել ՀՀ արտաքին գործերի նախարարության շենքի մոտ:
