Ալմաթիի հռչակագիրը որպես ՀՀ և Ադրբեջանի միջև սահմանազատման բազային սկզբունք ընդունված է Հայաստանի և Ադրբեջանի կողմից և դա անշրջելի իրողություն է, քանի որ արձանագրված է երկու երկրների կողմից բարձր մակարդակով: Այս մասին այսօր մամուլի ասուլիսին ասաց ՀՀ վարչապետ Նիկոլ Փաշինյանը:
«Սահմանազատումը տեղի է ունենում Խորհրդային Միության իրավաբանական ուժ ունեցող ամենավերջին քարտեզների հիման վրա»,-ասաց նա:
Վարչապետն հավելեց, որ սահմանային սյուները տեղադրվում են իրավական հենքի վրա և այդ սահմանային սյուները դնում են անվտանգային երաշխիք Ոսկեպարի, Կիրանցի, Բերքաբերի, Բաղանիսի և ընդհանրապես ՀՀ-ի համար:
Նիկոլ Փաշինյանն ասաց, որ ՀՀ-ն գտնվում է մի իրավիճակում, որ չունի անվտանգության երաշխիքներ և պետք է ստեղծի դրանք: «Սահմանզատման նպատակն է՝ իրականացնել անվտանգության երաշխիքների ձևավորում և սահմանային սյուները անվտանգության երաշխիքների սյուներ են, անվտանգության սյուներ են: Այս փուլում մեր նպատակն է այնպես անել, որ պատերազմը բացառվի, և մենք գնում ենք այդ ճանապարհով»,- ասաց նա և նկատեց, որ առաջին անգամ է, որ անվտանգության երաշխիք ենք ստեղծում ինքնիշխան որոշման շրջանակներում: